iklan

EKONOMIA, HEADLINE, MUNISÍPIU, VIQUEQUE

Fundasaun KHK apoiu materiál hodi tulun atividade grupu KHF

Fundasaun KHK apoiu materiál hodi tulun atividade grupu KHF

Administradór postu Ossu, Sebastião Pereira Pires, entrega materiál ba Koordenadora grupu K’nua Hadomi Futuru, Aguida Freitas da Costa, iha suku Ossurua, sesta (24/06). Imajen Tatoli/Vitorino Lopes da Costa

VIQUEQUE, 24 juñu 2022 (TATOLI)–Organizasaun Naun Govermental Fundasaun K’nua Haberan Komunidade (KHK) munisípiu Viqueque, fó apoiu materiál no orsamentu ba grupu K’nua Hadomi Futuru (KHF) hodi reforsa atividade ortikultura, iha suku Ossorua, postu administrativu Ossu, munisípiu Viqueque.

“Ohin ami fó apoiu materiál ba atividade ortikultura ba ita-nia grupu K’nua Hadomi Futuru hodi hasa’e produtividade. Nune’e, bele hasa’e mós ekonomia uma-laran hodi sustenta família,” Diretór Ezekutivu Fundasaun KHK, Agusto Pinto, hateten ba Agência Tatoli, iha suku Ossurua, sesta ne’e.

Notísia relevante: KHK apoia materiál ba grupu Luru-Boro hodi hakbiit ortikultura

Matériál agrikultura ne’ebé oferese maka hanesan, sanyo ida, tanki bee ida, mangeira rua, rede taka modo tolu, ensada, ai-suak no fini modo musan.

Inisiativa ne’e hodi fasilita grupu KHF nia atividade kuda modo ne’ebé loron ba loron sira hala’o.

“Tanba ne’e, KHK hamutuk ho parseiru fó apoiu materiál ba grupu sira. Ami mós fó apoiu orsamentu ho montante $500 hodi reforsa atividade rai no impresta nian. Tanba grupu ne’e iha atividade rua hanesan ortikultura no rai osan,” nia akresenta.

Biban ne’e, nia agradese ba grupu KHF ne’ebé kolabora ona ba atividade jéneru atu redús violénsia iha família no komunidade.

Iha fatin hanesan, Xefe suku, Eduardo da Silva Freitas, agradese ba ONG KHK ne’ebé fó apoiu matéria hodi tulun grupu hasa’e produsaun.

“Liuhosi sira-ne’e bele ajuda ha’u-nia populasaun sira-nia atividade hodi hasa’e rendimentu ekonomia,” nia tenik.

Iha biban ne’e, Koordenadora KHF, Aguida Freitas da Costa, apresia inisiativa ne’e hodi reforsa atividade grupu.

“Ami agradese ba KHK. Hosi apoia sira-ne’e bele motiva ami halo serbisu ho badinas no hasa’e produtividade,” nia tenik.

Atividade distribuisaun materiál ne’e hodi Administradór postu Ossu Sebastião Pereira Pires, Diretór Fundasaun KHK no akompaña hosi xefe suku Ossorua.

Jornalista  : Vitorino Lopes da Costa

Editora      : Julia Chatarina

iklan
iklan

Leave a Reply

iklan
error: Content is protected !!