DILI, 24 juñu 2022 (TATOLI)—Primeiru-Ministru Interinu no Atuál Ministru Prezidénsia Konsellu Ministru (PCM, siglá portugés), Fidelis Manuel Leite Magalhães, sesta ne’e, hala’o enkontru ho Prezidente Repúblika (PR), José Ramos Horta, hodi relata atividade VIII Governu Konstituisional iha setór sosiál no kapitál umanu.
“Iha enkontru ne’e atu hato’o ka relata kona-ba andamentu ezekusaun no programa sira iha setór sosiál no setór ne’ebé relasióna ho dezenvolvimentu kapitál umanu to’o tinan ne’e, hodi haree prióridade saida mak Governu hanoin ona iha tinan 2023,” PM Interinu ne’e hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, Dili, sesta ne’e.
Nia hato’o mós atividade Governu iha setór sosiál hanesan implementasaun programa bolsa da mãe jerasaun foun, programa melloramentu iha ezekusaun no implementasaun alimentasaun eskolár, programa hadi’a di’ak liután sistema pre-eskolár ba PR.
Tanba ne’e, nia relata ba Xefe Estadu ho programa sira hotu bainhira tinan ne’e ramata no programa Governu ba tinan oin ne’ebé barak mós hatuur ona iha programa Grande Opsaun Planu, ne’ebé aprova iha Parlamentu Nasionál no promulgadu ona hosi Xefe Estadu.
“Entaun objetivu prinsipál mak atu iha diskusaun ida ho Xefe Estadu no rona preokupasaun sira hosi Xefe Estadu atu iha aliñamentu ne’ebé di’akliu entre preokupasaun sira Xefe Estadu nian no programa sira-ne’ebé Governu hatuur ona ka hanoin hela ba tinan oin,” nia dehan.
Governante ne’e hatutan, komponente keta-ketak iha programa VIII Governu Konstitusionál nian hanesan setór infraestrutura, ekonómia, boa-governasaun, maske durante sorumutu ho PR la ko’alia maibé foku liu ba kapitál sosiál iha setór hirak ne’ebé iha área sosiál nian.
Durante sorumutu ne’e, PR nia preokupasaun mak oinsá servisu hamutuk ho ezekutivu atu bele lori dezenvolvimentu ida-ne’ebé di’akliu kontribui ba Timor-Leste nia sidadaun nia saúde di’akliu, labarik sira bele matenek iha futuru hodi kompete iha mundu nune’e presiza kondisaun di’ak ba labarik no família sira.
Ko’alia mós kona-ba oinsá kombate má nutrisaun, haree setór saúde enjerál, labarik sira-nia saúde, inan isin rua sira-nia saúde kona-ba saúde inan sira-nia saúde no haree kona-ba mekanizmu no medida saida mak Governu halo ka adapta atu lori edukasaun ba uma kain sira atu eskola iha uma no asesu saúde iha kada uma kain.
Entertantu iha enkontru ne’e akompañadu hosi Ministru Finansa, Rui Augusto Gomes, Ministru Edukasaun Juventude no Desportu (MEJD), Armindo Maia, Ministru Ensinu Superiór Siensia no kultura (MESSK), Longuinhos dos Santos, Ministra Saúde, Odete Maria Freitas Belo, Vise Ministra Solidariedade Sosiál no Inkluzaun (MSSI), Signi Chandrawati Verdial.
Jornalista : Nelson de Sousa
Editór : Cancio Ximenes
