iklan

EKONOMIA, HEADLINE

Semana oin, SEKoop lansa distribuisaun Cesta Bázika faze daruak iha Laclubar

Semana oin, SEKoop lansa distribuisaun Cesta Bázika faze daruak iha Laclubar

Produtu Cesta Bázika iha bote-laran Imajen TATOLI/Antónia Gusmão

DILI, 24 juñu 2022 (TATOLI)–Sekretáriu Estadu Kooperativa (SEKoop), Elizário Ferreira, hateten, semana oin sei halo lansamentu distribuisaun Cesta Bázika faze daruak.

“Ministériu Turizmu Komérsiu Indústria (MTKI) halo ona lansamentu distribuisaun Cesta Bázika faze daruak, semana oin iha loron 29 juñu parte Sekretaria Estadu Kooperativa mós sei lansa distribuisaun Cesta Bázika faze daruak iha postu administrativu Laclubar, munisípiu Manatuto, ne’e ajendadu ona,” Sekretáriu Estadu informa ba Agência Tatoli, hafoin ramata breafing funsionáriu ba monitorizasaun distribuisaun programa Cesta Bázika faze daruak, iha Fundasaun Hanai Malu, Bairru Pité, sesta ne’e.  

Notísia relevante: Governu lansa distribuisaun Cesta Bázika faze daruak iha aldeia Baia Leste

Empreza ne’ebé daudaun hatama dokumentu hodi konkorre iha distribuisaun Cesta Bázika hosi parte SEKoop iha 560, maibé hafoin parte komisaun téknika halo prosesu selesaun dokumentu, iha empreza 324.

“Agora tama ona ba faze ikus hosi 324, ita sei presiza de’it empreza 100 maka sei envolve iha  distribuisaun Cesta Bázika nian,” nia akresenta.

SEKoop responsabiliza distribuisaun iha postu administrativu 42 no suku 200 resin, ne’ebé empreza rua sei koloka iha postu administrativu ida.

Biban ne’e, Elizário Ferreira  garante distribuisaun hosi parte SEKoop sei uza produtu lokál 75% hanesan lei haruka, tanba iha distribuisaun Cesta Bázika faze dahuluk SEKoop hatudu ona produtu empakotementu maioria produtu lokál.

“Husu ba empreza sira tenke kontinua nafatin ho ida-ne’e, kuandu balun viola regra distribuisaun, ami sei fó sansaun, tanba tinan kotuk ita fó sansaun ba empreza rua hafoin sira viola regra distribuisaun iha faze dahuluk,” nia fó hanoin.

Nune’e, Sekretáriu Estadu husu ba funsionáriu SEKoop atu hamutuk halo monitoizasaun di’ak ba atividade distribuisaun produtu, nune’e bele fó susesu ba programa Governu ne’e.

“Ha’u husu ba ita-boot sira tenke halo kontrolu programa ne’e ho di’ak, labele hamutuk ho empreza sira hodi buka lukru, ida-ne’e ha’u lakohi. Ita la’ós atu defende empreza ida nia interese, maibé povu nia interese,” governante ne’e hameno.

Iha fatin hanesan, Diretór Jerál ba prevensaun Komisaun Antí-Korrupsaun (CAC, sigla portugés), Rosário Salsinha Araújo, husu  funsionáriu SEKoop bainhira iha komunidade sira-nia le’et, labele koko hamosu lamentasaun no kestaun sira.

“Ita bá ho paradigma foun, hadomi duni povu maka ita bá, ita tenke ajuda duni povu rezolve sira-nia problema, ita tau-matan no asegura nafatin sasán sira ne’e nia presu tenke razoável no sasán labele a’at, dodok no foer, atu bele trata komunidade ho digñu. Cesta Bázika hanesan parte kiik-oan ida hodi bele ajuda komunidade nia problema, maski la rezolve totál maibé pelumenus aguenta hodi kontinua moris,” nia tenik.

Jornalista : Natalino Costa

Editora     : Julia Chatarina

iklan
iklan

Leave a Reply

iklan
error: Content is protected !!