HEADLINE, NASIONÁL, POLÍTIKA

PLP reajusta estrutura iha postu administrativu Na’in-Feto

PLP reajusta estrutura iha postu administrativu Na’in-Feto

PLP fó pose ba estrutura foun iha postu administrativu Nain-Feto, Dili, iha sede Veteranu, Taibessi, sabadu (25/06). Imajen Tatoli/Francisco Sony

DILI, 25 junu 2022 (TATOLI)–Partidu Libertasaun Popular (PLP), sabádu ne’e, hahú rejusta estrutura, liuhosi fó pose ba membru foun iha baze nune’e bele halo atividade partidária ho di’ak.

“Atividade pose ne’e munisípiu halo, normalmente ba postu hotu-hotu, maibé ohin espesífiku iha postu administrativu Nain-Feto hodi halo reajustamentu tomada pose ba estrutura ne’ebé mak durante ne’e balun mate no balun laiha vontade atu serbisu, nune’e ami prienxe fali hodi halo ami-nia atividade partidária hodi reforsa iha tinan 2023,” Koordenadór Partidu PLP munisípiu Dili, Mário Freitas, hateten ba iha sede Veteranu, iha Taibessi.

Notísia  relevante: PLP sei realiza kongresu nasionál iha setembru

Atividade pose estrutura foun PLP iha postu administrativu Nain-Feto, Dili, iha sede Veteranu, Taibessi, sabadu (25/06). Imajen Tatoli/Francisco Sony

Atividade tomada pose iha postu administrativu Na’in-Feto, kompostu hosi suku Santa Crús, Bemori no Lahane Ocidental.

“Aban ami sei halo iha Cristo Rei. Ami halo tuir kontíudu partidária ne’ebé iha,” nia akresenta.

Nia dehan, kona-ba preparasaun hasoru Eleisaun Parlamentár tinan 2023, desde inísiu kedas prepara ho di’ak no dignu iha baze hotu, hodi reforsa líder másimu partidu ne’ebé agora kaer pasta iha VIII Governu Konstitusionál.

“Ami iha esperansa no fó korajen nafatin ba ami-nia apoiante sira katak ami serbisu hamutuk, nune’e iha tinan 2023 ami sei lori vitória ba PLP iha Parlamentu,” nia otimista.

Koordenadór PLP postu administrativu Na’in-Feto eleitu períodu 2022-2027, Júlio Amorin do Santos, hateten, objetivu reajusta estrutura hodi bele serbisu ho di’ak iha baze no lori partidu  sai vensedór iha eleisaun tinan oin.

PLP fó pose ba estrutura foun iha postu administrativu Nain-Feto, Dili, iha sede Veteranu, Taibessi, sabadu (25/06). Imajen Tatoli/Francisco Sony

“Kargu ne’ebé fó fiar hosi ha’u-nia líder PLP belun boot, Taur Matan Ruak, hanesan ami-nia Prezidente partidu, ohin ami simu pose iha postu administrativu Na’in-Feto, ho estrutura suku neen hamutuk 189, mai ho postura foun hosi partidu oin-oin mak hamutuk iha postu Na’in-Feto,” nia tenik.

Nune’e, nia apresia ba konfiansa no komprometidu sei responsabiliza knaar ne’ebé partidu estabelese iha baze.

“Nune’e, hodi prepara ami-nia polítika iha baze atu gaña tan votus maioria iha Dili ba PLP atu lori munisípiu Dili atinje meta ne’ebé PLP presiza,” Koordenadór eleitu dehan.

Jornalista  : Nelia Fernandes

Editora       : Julia Chatarina

iklan
iklan

Leave a Reply

iklan
error: Content is protected !!