iklan

HEADLINE, NASIONÁL, POLÍTIKA

PUDD verifika estrutura hasoru Eleisaun Parlamentár 2023

PUDD verifika estrutura hasoru Eleisaun Parlamentár 2023

PUDD realiza konférensia nasionál daruak, iha salaun Esperansa, Delta, sabadu (25/06). Imajen Tatoli/Francisco Sony

DILI, 25 juñu 2022 (TATOLI)–Partidu Unidade Dezenvolvimentu Demokrátiku (PUDD), sabádu ne’e, hala’o segundu konferénsia nasionál ba konsellu permanente-órgaun masa juventude partidu ho tema ‘Papel juventude polítika mak autór ba unidade, estabilidade, no dezenvolvimentu nasionál’, hodi prepara-an hasoru Eleisaun Parlamentár iha tinan 2023.

Prezidente PUDD interinu, Silvestre Sufa. Imajen Tatoli/Francisco Sony

Prezidente PUDD interinu, Silvestre Sufa, hateten, konferénsia ne’e ba órgaun masa juventude partidu, ne’ebé atividade ne’e rasik hala’o iha kada tinan-lima molok atu tama eleisaun ida.

“Konferénsia ida-ne’e atubele haree no verifika filafali estrutura anteriór ne’ebé iha tinan 2017 ita hatúr, konserteza balun laiha ona no balun bele ses fali ba partidu seluk. Hosi ne’e, ita komesa ona hadi’a atu nune’e bele forma estrutura ne’e sai hanesan baze forte ida ba PUDD atubele hasoru eleisaun iha tinan 2023. Tanba ne’e, ohin PUDD hala’o konferénsia ba órgaun masa juventude atu prepara joven iha órgaun sira ida-idak bele book-an hala’o serbisu,” Prezidente PUDD interinu hateten iha salaun Esperansa, Delta, sabádu ne’e.

Notísia relevante: PUDD hametin prinsípiu prepara-aan ba eleisaun prezidensiál

Nia konsidera, estrutura ne’e hanesan mákina ida, tanba susesu ba partidu ida depende ba estrutura, nune’e bainhira estrutura laiha, ema labele lori partidu ba oin tanba buat hotu depende ba estrutura.

Ho estrutura metin iha baze PUDD prontu hasoru Eleisaun Parlamentár iha tinan oin.

PUDD realiza konférensia nasionál daruak, iha salaun Esperansa, Delta, sabadu (25/06). Imajen Tatoli/Francisco Sony

“Ami prontu tanba durante ne’e ami hahú ona hosi baze, ita halo tomada pose ba estrutura tomak hahú hosi baze, área remota sa’e to’o munisípiu. Ohin loron tama ona ba iha órgaun sira iha nível nasionál. Órgaun sira ita ramata rua ona, foin daudaun órgaun feto PUDD no ohin ba órgaun juventude partidu. Iha loron 02 jullu ba órgaun profisionál partidu. Hafoin mai iha jullu nia laran mak ita tama kongresu partidu atu determina legalidade ba serbisu sira ne’e hotu,” nia tenik.

Tanba ne’e, PUDD otimista bele liu bareira iha Eleisaun Parlamentár tuir mai.

“Ami fiar-an PUDD laiha problema tanba ita-nia baze sufisiente no metin, tanba joven iha ne’ebé de’it, tantu iha área remota mós joven iha. Tanba ne’e, ami prontu hasoru Eleisaun Jerál,” nia tenik.

Partisipante ba segundu konferénsia nasionál ne’e mai hosi órgaun masa juventude hosi 12 munisípiu inklui Rejiaun Administrativu Espesiál Oé-cusse Ambeno (RAEOA) no reprezentante partidu Frente Revolusionáriu Timor-Leste Independente (FRETILIN) no Prezidente Konsellu Nasionál Juventude Timor-Leste (CMJTL), Maria Dadi Soares Magno.

Jornalista  : Nelia Fernandes

Editora      : Julia Chatarina

iklan
iklan

Leave a Reply

iklan
error: Content is protected !!