BOBONARO, 25 juñu 2022 (TATOLI)–Sekretáriu Estadu Asuntu Kombatente Libertasaun Nasionál (SEAKLN), Júlio da Conceição ‘Loro Mesak’, sábadu ne’e, enserra segunda verifikasaun baze dadus kombatente libertasaun nasionál ne’ebé rejistadu tinan 2009 iha suku Oeleu, reprezenta postu administrativu Bobonaro tomak iha munisípiu Bobonaro.
Autoridade no komunidade lokál simu Sekretáriu Estadu no komitiva ho serimónia kulturál tara tais hosi Lia-na’in hosi uma lisan Letengen, Belegatál, Lethe-Bul no líder komunitária, ne’ebé hetan partisipasaun másimu hosi komunidade no akompaña ho dansa tradisionál bidu no baku babadok tuir kultura suku.
Estafeta Direita Falintil no atuál Xede suku Oeleu, Januário Bragansa ‘Buka Maluk’, lori komunidade nia naran apresia no onradu ho prezensa Sekretáriu Estadu Loro Mesak tamba maski serbisu barak maibé disponibliza ona tempu hodi partisipa iha serimónia ne’e.
“Hau hakarak husu ba sua exelénsia, sira ne’ebé pendente grau 4-7 no 0-3 rejistadu iha tinan 2003, bainhira mak realiza filafali verifikasaun hodi sira bele hetan sira-nia direitu, hafoin ami iha ne’e rezisténsia barak mak sei halerik hakarak rejistu maibé seidauk, to’o agora sira tinan 2009 verifika ona,” Vetenanu ne’e hateten iha suku Oeleu.
Notisia relevante: MAKLN sei verifika fali reklamasaun 11.000-resin hosi veteranu sira
Totál kombatente rejistadu iha suku ne’e tinan 2009 hamutuk 176, maibé iha na’in-23 mak la partisipa iha prosesu verifikasaun inklui sira ne’ebé rejista iha tinan 2004 mós sei pendente.
Iha biban hanesan, Sekretáriu Estadu Loro Mesak, hateten prosesu verifikasaun ne’e la’o transparante no independente, nune’e husu kombatente sira iha Oeleu no postu Bobonaro tomak labele tauk komisaun halo manipulasaun ka familiarizmu, tanba molok ne’e komisaun ne’ebé halo verifikasaun dadus kompostu hosi Prezidente Komisaun Verifikasaun munisípiu Bobonaro, Jacinto Viegas Vicente ‘Roque’, Prezidente Konselu Veteranu munisípiu Bobonaro, Jaime Romão do Santos ‘Dotim’ inklui ekipa rezisténsia hotu halo juramentu ona iha Jardim dos Herois iha Metinaro, Dili.
“Hau-nia aman sira, imi keta tauk, ida Falintil sira resposável sira iha vila, sub rejiaun, no postu ne’ebé uluk imi fó han, fó hena, ohin loron sira mak mai entrevista imi, maibé ha’u atu dehan de’it imi-nia istória no deklarasaun rasik mak sei lori imi bá, laiha ema ida mak lori bá,” nia dehan.
Notisia Relevante: Verifikasaun dadus veteranu rejistadu 2009 atinje ona 62%
Aleinde ne’e, tempu badak Governu sei orienta komisaun rejista filafali dadus kombatente grau 4-7 rejista iha tinan 2004 ne’ebé pendente hela inklui sira ne’ebé seidauk rejistu to’o agora tamba sei loke fali prosesu verifikasaun faze datoluk.
“Ha’u promote ba imi katak iha Loro Mesak nia tempu sei laiha veteranu liuhosi lutu hanesan, sira ne’ebé dehan liuhosi tali-laran, só uluk mak iha, agora sei la halo ida-ne’e, tamba ita tenke halo mundasan, se iha veteranu pasta boot sira mak bá bosok imi informa mai ami, hau-nia odomatan nakloke ba imi tamba tempu to’o ona atu ita atu hateten buat loos,” nia fó hanoin.
Biban ne’e, Prezidente Komisaun Verifikasaun munisípiu Bobonaro, Jacinto Viegas Vicente ‘Roque’, sente orgullu no agradese ba kombatente sira inklui komunidade suku Oeleu tamba durante loron-haat simu ho dignidade no koopera tebes ho komisaun.
“Hau husu ita nafatin unidade atu foti nafatin ita-nia organizasaun ne’ebé uluk ita kaer, ita hamutuk tane a’as nafatin maski imi bele bá ne’ebé deit, ha’u mós hakarak rekomenda hela ba imi molok ami hakat ba postu seluk, ita-nia komunikasaun tenke la’o di’ak no metin nafatin, atu nune’e buat ne’e labele tama iha manipulasaun hosi ema seluk,” nia apela.
Prosesu verifikasaun iha munisípiu Bobonaro konklui ona iha postu administrativu Atabae, Balibo, no Loloto’e no semana oin sei kontinua iha Cailaco no ikus liu iha Maliana vila sei ramata iha fulan setembru nia rohan.
Jornalista : Sérgio da Cruz
Editora : Julia Chatarina
