iklan

EDUKASAUN, HEADLINE, NASIONÁL

SLXG organiza diálogu ba foin-sa’e kona-ba vida voluntarizmu

SLXG organiza diálogu ba foin-sa’e kona-ba vida voluntarizmu

Joven foin-sa’e partisipa semináriu iha Sala Leitura Xanana Gusmão, iha Bidau Lecidere, sábadu (25/06). Imajen Tatoli/Nelia Fernandes

DILI, 25 junu 2022 (TATOLI)–Sala Leitura Xanana Gusmão (SLXG) hamutuk ho joven voluntárizmu, sabádu ne’e, organiza semináriu ho tema ‘Promove joven produtivu milenial hodi hasa’e sira-nia kapasidade’.

“Semináriu ne’e, ita-nia joven foin-sa’e sira mak mai fahe sira-nia esperiénsia, ligasaun ho vida voluntáriu, ho objetivu fundamentu ida mak oinsá fó oportunidade ba joven sira hasoru malu halo diálogu, liuhosi fahe esperiénsia ba malu. Semináriu ne’e ita konsidera katak diálogu foin-sa’e,” Ofisiál Projetu SLXG, Jorónimo Fernandes, hateten ba Agência Tatoli, iha salaun SLXG, Bidau Lecidere.

Notísia relevante: UNESCO apoia rihun $20 ba Sala Leitura Xanana Gusmão instala katálogu dijitál

Tema ne’ebé hili tanba semináriu ne’e konsidera hanesan diálogu foin-sa’e, entaun haree katak foin-sa’e sira ne’ebé mai produtivu.

“Produtivu hanesan ohin ita-nia oradór sira hateten, presiza joven produtivu katak tenke hanoin kreativu no inovativu hodi halo mudansa ba ita-nia sosiedade, liliu ligasaun ho meiu ambiente nian, oinsá atu forma joven ho hanoin krítiku atubele kontribui ba ita-nia dezenvolvimentu nasionál,” nia tenik.

Oradór I ba semináriu, José Raul, konsidera tópiku ne’ebé hili tanba durante ne’e hasoru problema barak, liuliu ligadu ho teknologia hanesan telefone.

“Telefone durante ne’e ema uja hanesan meiu no instrumentu ida, maibé dala ruma ema uza la hatene, la’ós ita mak uza telefone, maibé telefone mak uza fali ita. Hanesan kuandu ita tuur hamutuk ho inan-aman ka kolega besik ita, kuandu telefone ne’e lian ita prefere haree telefone kompara komunika ho ema iha ita-nia sorin, hosi ne’e ninia rezultadu ikus mak hamosu ita-nia relasaun ladún metin. Entaun, ida-ne’e sai hanesan problema tanba ne’e foti tópiku ne’e hodi halo diskusaun iha semináriu ne’e,” nia esplika.

Aleinde ne’e, tuir nia, joven lubuk ida mak durante ne’e sai ona vítima ba teknologia, hanesan ema ne’ebé besik nia ladún ko’alia, maibé nia prefere liu ko’alia ho buat ne’ebé dook.

“Uza teknologia dala ruma nia la hatudu an loloos, maibé nia hatudu nia-an falsu. Ema ida de’it, dala ruma nia iha facebook rua ka tolu, hanesan mós ho whatsapp. Sentidu katak teknolojia ita sai vítima tanba ita manipula ita-nia an iha rede sosiál. Iha teknologia rasik ne’e mós ita la hatúr ita-nia an loloos, hanesan ita-nia oin baibain hela, maibé dala ruma tau iha teknologia ita bonita liu fali, entaun ita lakon ita-nia identidade loloos,” nia tenik.

Ho ida-ne’e, dalan atu rezolve mak iha buat lima hanesan tenke krítiku, kreativu, konektivu, komunikativu no kolaborativu,

“Se ita sente katak uza teknologia ha’u sai vítima no sai problema ba ha’u mak ha’u labele kria relasaun di’ak ho família no kolega sira. Pelemenus solusaun saida mak ha’u tenke foti, buka resposta 10, hosi hanoin krítiku ne’ebé halo ho hili ida no la’o ho ida-ne’e. Se halo ba mak di’ak, fó hatene, komunika no koolabora ho kolega sira seluk atu joven timor-oan hotu bele ko’alia, tanba ita la’ós joven ba ita-nia an de’it maibé joven ba Timor, tanba ne’e buat di’ak hosi ema ida, nia tenke komunika,” nia dehan.

Nune’e, Estudante Universidade Nasionál Timor-Lorosa’e (UNTL), António Pereira, kontente bele  partisipa iha semináriu ne’e tanba bele aumenta koñesimentu.

“Semináriu ne’e importante tebes, tanba hanesan estudante no joven ida, oinsá hanoin ba futuru nasaun nia no dezenvolve. Tanba joven mak destinu nasaun nia dezenvolvimentu iha futuru,” nia dehan.

Estudante UNTL, Jiconi dos Santos, hateten, partisipa semináriu ne’e bele hetan espesiénsia lubuk ida.

“Ha’u sente kontente tanba bele transforma ona joven sira karakter no joven sira-nia atitude, nune’e sira bele konsiénte atu aprende saida mak sira hakarak aprende, Nune’e, saida mak ha’u hetan hosi formasaun ne’e, ha’u sei fahe ba kolega seluk ne’ebé mak ohin la partisipa iha ne’e,” nia dehan.

Jornalista  : Nelia Fernandes

Editora       : Julia Chatarina

iklan
iklan

Leave a Reply

iklan
error: Content is protected !!