OPINIAUN

Abut família mak komunika ba malu

Abut família mak komunika ba malu

Joana da Costa Gusmão, MS. Ed.

Hosi:

Joana da Costa Gusmão

Ko’alia kona-ba komunikasaun, ita hanoin kedas instrumentu komplementáriu ne’ebé bele halo ita hatene no haree situasaun rai seluk ka rai-laran, hanesan televizaun ka meius ida ne’ebé fasilita ita hodi komunika ho ema ne’ebé mak dook ho kilómetru barak hanesan telefone, messenger, whatsapp, no seluk tan. Maibé komunikasaun ne’e la sufisiente de’it ho ida ne’e. Iha ita-nia moris loron-loron, pur-volta pursentu 90 ita halo komunikasaun ka ko’alia ba malu. Ita komunika hahú kedas husi kosok-oan ne’ebé iha inan-nia kanotak to’o ferik-katuas tiha. Nune’e mós, iha uma, iha servisu fatin, iha fatin hotu-hotu, hanesan mós bainhira ita hasoru malu ho Maromak liu-husi ita-nia orasaun pesoál ka grupu.

Komunikasaun ne’ebé ita hakarak deskreve iha ne’e mak sei foka liu ba iha komunikasaun ne’ebé eskluzivu nu’udar família, ka nu’udar uma-kain ho sira ne’ebé ho idade 11 to’o iha idade 22. Iha ita-nia sosiedade oras ne’e, ita hahú haree oinsá inan-aman ida bainhira prepara-an atu simu kosok-oan. Foin mak kosok-oan book-an iha inan-nia kanotak, inan-aman haksolok hodi ko’alia ona ho kosok-oan ne’e, maske la haree no la rona. Bainhira moris tiha, husi nia hahalok sira hanesan tanis, bele hatene moras ka hamlaha. Bainhira kosok-oan hamnasa, ita hatene katak nia haksolok. Inan-aman haksolok tebes ho oan sira-nia progressu dezenvolvimentu. Bainhira tama ba tempu eskola, sira habelar komunikasaun ho sira-nia kolega. Inan-aman haksolok nafatin hodi husu tuir, saida mak oan sira hetan iha eskola.

Hahú tama ba tempu adolexente husi idade 11 to’o 22, situasaun oin-seluk liutan, entre oan-sira no inan-aman. Oan-sira sente bo’ot ona, iha kolega barak atu loke laran, no sira bele rona malu, kumpriende malu iha sira-nia tempu ksolok no susar nia laran.

Inan-aman iha hanoin rua kona-ba oan-sira ho idade ida ne’e. Iha parte ida, sira hanoin katak oan-sira ne’e bo’ot ona, tenki halo servisu hamutuk inan-aman atu apriende husi inan-aman prosesu servisu no meius ida hodi tulun inan-aman. Maibé, dalabarak mos, inan-aman sira sei konsidera sira nu’udar labarik. Iha ne’ebé seidauk fó fiar ba sira atu hola desizaun ruma, la fó oportunidade ba sira atu bele ko’alia ho inan-aman sira iha problema balun, inklui fó opinaun.

Hahú husi ne’e, mosu ona iha adolexente nia hanoin kona-ba sira-nia pozisaun. Iha sira-nia laran, ka sira mós bele konta ba kolega sira seluk, tansá mak atu hala’o knaar ruma, inan-aman ita-bo’ot ona. Maibé ita hakarak namora ka ita rona sira ko’alia buat ruma importante, sira hateten katak ita sei labarik. Ida ne’ebé mak loos? Dalabarak mosu iha sira-nia hanoin atu revolta ka hatán hasoru ina-aman sira bainhira husu sira atu servisu, tan sira sente mesak, la hetan suporta di’ak iha uma.

Iha ne’e, hahú mosu ona konflitu entre inan-aman ho adolexente kona-ba komunikasaun. Etapa ida ne’e ita bele haree katak menus ona komunikasaun entre inan-aman ho oan sira ne’ebé idade adolexente.

Tan ne’e, adolexente sira gosta liu atu ko’alia ho kolega sira ho tinan hanesan, tan sira iha problema hanesan, no sira bele rona malu. Maibé dalabarak ho natureza adolexente nian, halo sira la’os de’it apriende buat ne’ebé pozitivu, maibé bele apriende buat seluk ne’ebé ladun di’ak ba sira-nia futuru.

Tan ne’e, inan-aman atu hakbesik nafatin ba oan sira, liu-liu ho sira ne’ebé idade adolexente hodi buka komunika nafatin ho sira atu hatene saida mak sira-nia presiza. Karik ita la komunika ba malu, oinsá ita bele komunika ho Maromak iha ita-nia orasaun sira? Komunika ba malu iha família ida ne’e importante tebes hodi kontribui ba redús konflitu iha família, sosiedade, no nasaun ida atu iha armónia. (*)

Hakerek nain nu’udar Diretora Ezekutivu Organizasaun Sosiedade Sivil Empreza Di’ak.

iklan
iklan

Leave a Reply

iklan
error: Content is protected !!