DILI, 27 juñu 2022 (TATOLI)—Autoridade Inspesaun no Fiskalizasaun Atividade Ekonómika, Alimentár no Sanitária, Institutu Públiku (AIFAESA, I.P) prontu simu keixa reklamasaun relasiona ho implementasaun programa Cesta Bázika faze daruak.
Inspetór Jerál AIFAESA, I.P, Ernesto Monteiro, dehan, funsionáriu AIFAESA la sufisiente tun ba terrenu halo monitorizasaun, tanba ne’e maka fatin hirak ne’ebé ekipa la konsege kobre, bainhira mosu produtu balun la tuir saida mak prevee iha baze legál, autoridade lokál bele reprezenta komunidade hato’o keixa.
“Iha duni funsionáriu maibé própriu ba inspesaun ne’e menus, ho nune’e ami husu nafatin partisipasaun apoia tomak hosi autoridade lokál no konsumidór rasik, katak buat ruma ne’ebé la tuir duni regra no kondisaun ne’ebé iha, ami prontu simu keixa para rezolve tuir lei ne’ebé iha no knaar ne’ebé atribui ba ami,” Inspetór Jerál informa ba Agência Tatoli, iha ninia knaar fatin, Matadoru, segunda ne’e.
Notísia relevante: Governu lansa distribuisaun Cesta Bázika faze daruak iha aldeia Baia Leste
Tuir nia, meiu tékniku sai difikuldade ba AIFAESA hodi halo monitorizasaun ba implementasaun Cesta Bázika faze daruak, maski nune’e sei halo monitorizasaun durante implementasaun programa nasionál ne’e.
“Difikuldade ne’ebé ami hasoru maka falta transporte. Antes ne’e ami iha veíkulu 12 ho kondisaun di’ak hotu, maibé polítikamente ho despaixu dekretu Governu, limita transporte ba instituisaun hotu, entaun ami hatama tiha karreta lima ba patrimóniu Estadu, ami presiza maka ami halo fali proposta, ne’ebé ami hato’o ona proposta ba sira hodi fasilita karreta ba ami hodi halo atividade liuliu monitorizasaun ba Cesta Bázika,” nia akresenta.
AIFAESA sei halo monotorizasaun hamutuk ho instituisau seluk hanesan Komisaun Antí-Korrupsaun (CAC, sigla portugés), Provedoria Direitu Umanu no Justisa (PDHJ, sigla postugés) no instituisaun seluk tan.
“Ami halo ona reuniaun konjunta ida, iha sujestaun balun katak durante implementa Cesta Bázika, bainhira deskonfia foos kahur maka ami sei hapara provizóriu, halo tiha prosesu maka bele kontinua, aleinde ne’e bainhira produtu sira fahe mak deskonfia la loos, ami sei foti amostra, hafoin ami loke prosesu ba empreza ne’ebé toma-konta ba distribuisaun,” nia esplika.
Entretantu, foin lalais iha lansamentu no distribuisaun Cesta Bázika faze daruak ne’ebé hala’o iha 17 juñu 2022 partisipa mós hosi AIFAESA, CAC no PDHJ, ne’ebé molok entrega produtu sira ba benefisiáriu sira, ekipa AIFAESA, I.P halo uluk verifikasaun ba produtu sira.
Jornalista : Antónia Gusmão
Editora : Julia Chatarina
