iklan

DILI, HEADLINE, POLÍTIKA

Governu apela timoroan buka-hatene ajénsia fasilitadór molok ba servisu iha rai-li’ur

Governu apela timoroan buka-hatene ajénsia fasilitadór molok ba servisu iha rai-li’ur

Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo. Imajen TATOLI/António Gonçalves.

DILI, 27 juñu 2022 (TATOLI)—Governu liuhosi Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, apela ba timoroan hotu atu presiza buka hatene didi’ak ajénsia fasilitadór molok ba servisu iha rai-li’ur nune’e ikus mai labele hasoru problema oioin.

Notísia Relevante: MNEK koopera ho INTERPOL salva traballadora timoroan na’in-hitu “terus” iha Dubai

Nia husu ba komunidade no timoroan sira labele ansi lai sai ba rai-li’ur hodi lihosi de’it ajénsia ne’ebé mak ema seidauk hatene klaru katak timoroan sira-ne’e atu hetan servisu ka lae.

“Ba sidadaun hotu-hotu, ita joven sira, se hakarak ba servisu iha rai-li’ur Governu la bandu ka la impede maibé kuidadu hatene didi’ak lai iha ne’eba sé mak atu garantia servisu ne’e. Ita labele halai tuir de’it, ita haree ita-nia maluk sira barak ba ona ita mós hakarak ba. Agora ita obriga família tenke presiza osan lubuk ida-ne’ebé gasta tiha, sosa tiha billete, buat hotu to’o iha ne’eba saida mak akontese tan,” Governante ne’e apela hodi hatán ba preokupasaun Deputadu sira-nian kona-ba traballadór timoroan feto na’in-hitu (7) ne’ebé daudaun ne’e terus no hela iha Dubai, Uni Emeradu Arabé (UEA), iha plenária Parlamentu Nasionál, segunda ne’e.

Tanba ne’e, Governu husu sidadaun hotu tenke hatene no kuidadu liu-liu joven sira no sé de’it mak hakarak ba rai-li’ur atu halo servisu tenke hatene loos lai, sé mak responsabiliza ba sira iha fatin ne’eba.

Governante ne’e hateten, kona-na hanoin atu ba Inglaterra ho Irlandia ne’e ninia regra klaru no ema hotu hatene ona maibé ba servisu iha Portugál ka rai-li’ur seluk hodi uza de’it pasaporte Timor-Leste ne’e tenke tetu didi’ak.

“Maibé kona-ba Portugál ho de’it pasaporte Timor-Leste hakarak ba servisu iha ne’eba la’ós labele, bele maibé presiza hatene loloos sé-sé mak responsabiliza iha ne’eba, nune’e too iha fatin destinadu ne’e bele hetan servisu,” nia hateten.

Tuir nia, ajénsia sira ne’ebé agora ministéiru liuhosi Governu halo kontaktu ho sira-ne’ebé mak haruka joven sira balun mai presta deklarasaun esplika prosesu hotu maibé balun mós seidauk mai.

Tanba ne’e. Governu la fó sala ema ida maibé husu de’it atu hatene kuidadu no atensaun di’ak liu atu sai ba ne’e hatene responsabilidade sé mak iha ne’eba atu fó servisu, ida-ne’e mak importante.

Liga ba traballadór timoroan feto na’in-hitu ne’ebé terus hela iha Dubai, Governu nafatin halo kontaktu ho embaiada hotu-hotu atu haree kestaun ne’e, no Timor-Leste nia embaixada iha Portugál halo hela levantamentu dadus buka tuir sira ne’e ba ne’ebé karik hodi akompaña.

“Relasiona ho joven sira ba rai-li’ur, hanoin iha ona semana liu ba ami halo ona esplikasaun katak sira-ne’ebé oras ne’e iha Portugál li hosi Ministéiru Negósiu Estranjeiru no Kooperasaun (MNEK) informa ona ba iha embaixada halo ona servisu hodi buka tuir timor-oan sira-ne’ebé ba buka servisu maibé ba la hetan servisu, oras ne’e preokupadu iha no embaixadór sira kontinua fó atensaun nafatin ba sira,” nia dehan.

Notísia Relevante: Bankada FRETILIN-KHUNTO-PD husu Governu fó asisténsia ba traballadór na’in-hitu iha Dubai

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!