iklan

EKONOMIA, HEADLINE, INTERNASIONÁL

JICA sei hadi’a estrada Beduku no konstrui fasilidade bee-moos

JICA sei hadi’a estrada Beduku no konstrui fasilidade bee-moos

Ministru Obra Públika, Abel Pires da Silva. Imajen Tatoli/Francisco Sony

DILI, 27 juñu 2022 (TATOLI)Japan International Cooperation Agency (JICA) apoia Governu hodi hadi’a estrada Beduku, postu administrativa Dom Aleixo, ne’ebé foin lalais hetan estragu impaktu hosi dezastre naturál no konstrui fasilidade bee-moos.

“Semana kotuk Konsellu Ministru autoriza ona Ministru Finansa asina kontratu ho JICA, ne’ebé fulan-jullu ne’e bele realiza ona, tanba dezeñu kompletu ona hein de’it formaliza kontratu bele implementa ona, ne’e ba projetu estrada iha ponte Comoro III no fasilidade bee-moos iha área ne’e duni,” Ministru Obra Públika, Abel Pires da Silva, hateten iha salaun MOP, Caicoli, segunda ne’e.

Notísia relevante: JICA kontribui millaun $7,4 reabilita urjente infraestrutura kauza kalamidade

Ligadu ho estragu infraestrutura públika sira seluk, presiza orsamentu millaun $300.

“Infraestrutura públika sira balun iha Dili laran hadi’a ona balun maibé seidauk tanba estragu barak tanba ne’e maka husu pasiensia ba povu no kontinua fó apoia ba ami hodi hadi’a sasán sira ne’e tanba estragu sira ne’e akontese iha loron ida de’it entaun presiza tempu naruk atu hadi’a hotu,” nia akresenta.

Governante ne’e dehan, enkontru koordenasaun ne’ebé hala’o ona deside implementa projetu 50, balun realiza ona no balun sei iha prosesu aprovizionamentu.

“Hakarak deklara ba públiku katak MOP tenta hela atu rezolve hotu no orsamentu sei uza fundu infraestrutura no husu tan apoia parseiru internasionál hanesan JICA, ne’ebé deside ona hadi’a balun,” nia informa.

Jornalista  : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!