iklan

BOBONARO, EDUKASAUN, HEADLINE, MUNISÍPIU

Konstrusaun sala tolu iha EPE Ritabou atinje 25%

Konstrusaun sala tolu iha EPE Ritabou atinje 25%

Konstrusaun foun Ensinu Pre-Eskolár (EPE) suku Ritabou, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 27 juñu 2022 (TATOLI) – Konstrusaun sala aula rua  iha Ensinu Pre- Eskolár  (EPE, sigla portugés) ne’ebé lokaliza iha suku Ritabou, postu administrativu Maliana, munisípiu Bobonaro atinje ona 25,34%.

Ministériu Edukasaun, Juventude no Desportu (MEJD) entrega obra ne’e liuhosi Projetu Konstrusaun no Reabilitasaun Infraestrutura Eskolár (PKRIE) tinan 2022 nian ho karáter komuntária. Projetu ne’e ho durasaun kontratu fulan-neen no totál orsamentu $ 82,501,62.

Notísia Relevante:Grupu komunitária hahú implementa konstrusaun EBF Oplegul

Prezidente Grupu Komunitária, Joaquim Perreira, esplika, projetu ne’e ho medida naruk metru 23,45 no luan sentímetru 8,90. Projetu ne’e hahú implementa iha loron 02 fulan-fevereiru no daudaun ne’e to’o ona faze atu cor sinta-leten.

Prezidente Grupu Komunitária Ensinu Pre-Eskolar (EPE) Suku Ritabou, Juaquim Perreira. Imajen Tatoli/Sérgio da Cruz.

“Ami-nia eskola ne’e iha sala aula ba estudante sira rua no sala ba profesór sira ida inklui hari’is-fatin kada aula no dapur iha laran kedas, ne’ebé dezde hahú to’o agora bazea ba dadus hosi tékniku atinje ona 25,34%, agora ami hein tán segundu pagamentu 50%, atu ami hahú fali serbisu seluk,” nia informa ba Agência Tatoli, iha kna’ar-fatin, segunda ne’e.

Nia dehan, durante implementasaun projetu ne’e hasoru difikuldade mak presu materiál konstrusaun, maibé andamentu konstrusaun nafatin la’o ho di’ak tanba grupu komunitária sira sólidu no badinas tebes.

Joaquim subliña, loloos ne’e MEJD la tau prioridade ba konstrusau EPE Ritabou tanba iha 2021 estudante na’in-60 resin de’it, maibé tinan ne’e tan hamutuk na’in-111.

“Ami agradese ho projetu ne’e tanba ida-ne’e mak ema dehan lori edukasaun ba baze, ami-nia oan ki’ik sira mós la ba eskola iha dook ona, komesa besik liután,” nia agradese.

Enkuantu MEJD prevee $2,409.512,03 iha tinan ne’e sei konstrui no reabilita eskola hamutuk 21 ho sala aula 76 iha munisípiu Bobonaro ne’ebé tama iha projetu komunitária.

Tuir rekizitu grupu komuntária sira atu hahú prosesu iha faze haat, hahú hosi prosedimentu ba konstrusaun faze dahuluk eskola sira sei foti fundu 25%, faze daruak 50% hafoin foti tán 75% hodi kompleta 100%.

Entretantu eskola 21 iha Bobonaro ne’ebé tama projetu komunitáriu mak hanesan EPE Atu-Aben, EPE Rita-bou, EPE Holsa, Ensinu Báziku Sentrál (EBC, sigla portugés) Gumer, EBC Hauba, Ensinu Báziku Filiál (EBF) Dilai.

Nune’e mós EBF Kota Boot, EBF Mazop, EBF Odelgomo, EBF Oplegul, EBF Boloi, EBF Cara-bau, EBF Ana-pal, EBF Maliubu, EBF Ferik Katuas, EBF Molop-Taz, EBF Opa Vila, EBF Halekou,  EBF Rairobo, ESJ Númeru I Maliana no  EBF 12 Abríl Março.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!