iklan

COVALIMA, POLÍTIKA

Lamesak: dadus kandidatu veteranu iha suku Debos mak seidauk verifika

Lamesak: dadus kandidatu veteranu iha suku Debos mak seidauk verifika

Prezidente ekipa verifikasaun, Francisco Doutel Sarmento ‘Lamesak’. Imajen Tatoli/Celestina Teles.

COVALIMA, 27 juñu 2022 (TATOLI)–Prezidente Ekipa Verifikadór Dadus, Francisco Doutel Sarmento “Lamesak” informa, komisaun verifikadór dadus kandidatu veteranu iha munisípiu covalima verifika ona dadus kandidatu veteranu iha suku 29 no falta suku Debos mak seidauk.

“Kona-ba verifikasaun ami to’o ona iha suku 29 no falta suku Debos mak seidauk. Tanba ne’e, ohin, ami komesa halo verifikasaun dadus ba kandidatu veteranu iha suku Camanasa ne’ebé sei verifika dadus kandidatu veteranu na’in-567,” Francisco Doutel Sarmento “Lamesak” hateten ba jornalista sira iha suku Camanasa, segunda ne’e.

Maske komisaun verifikadór ne’e verifika ona dadus kandidatu veteranu iha suku 29, maibé komisaun verifikador seidauk bele fó sai ba públiku dadus loloos liu-liu kandidatu na’in hira mak verifika ona no hira mak seidauk.

“Suku 29 kandidatu veteranu na’in hira mak verifika ona, ha’u seidauk bele fó sai tanba barak mak la partisipa. Ida-ne’ebe mak valida ona, ami seidauk belé fó sai maibé finaliza hotu ona mak foin bele fó sai,” nia hateten.

Tanba ne’e, nia dehan, suku 29 komisaun verifikadór kobre ona postu administrativu neen (6) no agora halo ona verifikasaun dadus kandidatu veteranu ne’ebé rejistu iha tinan 2009 iha suku Camanasa, postu administrativu Suai Vila, entaun falta de’it suku-ida atu finaliza verifikasaun dadus ne’e.

Bazea ba kalendáriu verifikasaun dadus kandidatu veteranu durante loron 11 maibé komisaun rasik esforsu sei la to’o loron 11 no durante loron tolu bele finaliza ona tanba loron ida bele halo entrevista kandidatu na’in-50, nune’e atu bele lalais aselera.

“Ami la tuir kalendáriu, ami aselera lalais tanba ita-nia inan-aman barak seidauk to’o. Balun mate ona oinsá mak ami bele entrevista ho sira hodi bele hetan nia direitu, maibé ami halo entrevista bazea ba kandidatu veteranu sira-ne’e mak iha. Se laiha, ami labele obriga ida-ne’e sira-nia direitu,” nia dehan.

Tuir kalendáriu hosi komisaun verifikadór dadus kandidatu veteranu ne’ebé rejista iha tinan 2009 sei finaliza iha loron 29 fulan-jullu tinan ne’e.

Antes ne’e, ekipa komisaun verifikasaun dadus veteranu finaliza ona verifikasaun dadus iha postu administrativu Fatululik, Fohorem, Fatumea, Tilomar no Zumalai, nune’e ekipa finaliza ona halo verifikasaun dadus kandidatu veteranu hamutuk na’in-9,963.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!