iklan

DILI, INKLUZAUN SOSIÁL

MEJD garante Ema ho Defisiénsia hotu bele asesu edukasaun inkluzivu

MEJD garante Ema ho Defisiénsia hotu bele asesu edukasaun inkluzivu

Ministru Edukasaun Joventude no Desportu, Armindo Maia. Imajen Tatoli/Francisco Sony

DILI, 27 juñu 2022 (TATOLI)—Ministru Edukasaun Juventude no Desportu (MEJD), Armindo Maia, hateten MEJD garante Ema ho Defisiénsia (Ehd) hotu iha Timor-Leste bele asesu edukasaun inkluzivu.

“Hanesan ita hotu hatene ita nia parseiru dezenvolvimentu UNICEF apoiu ekipamentu ba ita-nia Asosiasaun Halibur Defisiénsia Matan (AHDMTL) nian, hanesan mákina imprime braille no mákina gravasaun dijitál, nune’e mós software ne’ebé bele ajuda hadi’ak ensinu no aprendizajen ba labarik sira-ne’ebé ho defisiensia vizuál,” Governante ne’e hateten ba ba jornalista sira, iha eskritóriu AHDMTL Manleuana, Dili segunda ne’e.

Iha futuru MEJD sei haree materiál ne’ebé ema ho defisiénsia sira presiza, atu bele fasilita ema ho defisiénsia (EhD) sira-nia atividade no liuhosi materiál ne’e Ehd bele aprende ho di’ak liután.

Reprezentante UNICEF iha Timor Leste, Bilal Durrani, haktuir, partikularmente kontente entrega materiál hirak-ne’e ba ema ho defisiensia tanba materiál ne’e lori sira ba asesu edukasaun no informasaun loro-loron nian.

“Loron ohin, ha’u partikularmente sente kontente hola parte iha serimónia ida-ne’e hodi entrega ekipamentu sira hanesan mákina impresaun Braille no mákina gravasaun dijitál nune’e mós software ne’ebé mak bele ajuda hadi’ak ensinu no aprendizajen ba labarik sira-ne’ebe mak ho defisiensia vizual,” nia dehan.

UNICEF la’ós apoiu de’it ekipamentu maibé halo renovasaun ba fatin dormitóriu labarik mane nian, sanitária, bee-moos, saneamentu no ijéne, nune’e mós espasu fatin aprendizajen temporária iha sentru AHDMTL.

Ho apoiu ekipamentu no materiál ne’e, atu hadi’ak ensinu aprendizajen ba labarik sira ho defisiénsia matan iha Timor-Leste, ne’ebé konsagra ona iha Konstituisaun da Repúblika Timor -Leste nian. Tanba eskola sira-ne’e ladún iha ekipamentu ne’ebé atu suporta aprendizajen, laiha manorin ne’ebé ho espesializadu ba difisiénsia sira, no oinsá sira bele asesu ba kualidade edukasaun.

Relasiona ho ida-ne’e, UNICEF parseria ho AHDMTL halo ona formasaun ba manorin AHDMTL nian kona-ba oinsá hanorin labarik sira-ne’ebé ho defisiénsia matan kona-ba literária no númerasia báziku, uza braille no suporta teknolojia. Tanba ne’e, UNICEF servisu hamutuk ho ministériu sira atu hadi’ak provizaun labarik sira ho defisiénsia iha nasaun.

Diretór interinu AHDMTL, Gabriel de Sousa, apresia ba UNICEF ne’ebé apoiu ekipamentu hanesan printer braille, printer manuál no material seluk tan, ne’ebé sei fasilita membru defisiénte sira bele apreende iha fatin refere.

Diretór ne’e agradese mós ba UNICEF ne’ebé fó apoiu ona orsamentu kuaze rihun $14, hodi halo atividade defisiénsia nian iha munisípiu toluhanesan Ermera, Bobonaro no Liquiça.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!