iklan

DILI

Programa “Eskola iha Uma”, xefe aldeia hahú identifika labarik idade 3-7

Programa “Eskola iha Uma”, xefe aldeia hahú identifika labarik idade 3-7

Xefe Suku Bemori, Cristalina Perreira Soares de Oliveira. Imajén/Osória Marques

DILI, 27 juñu 2022 (TATOL)—Governu liuhosi Ministériu Edukasaun Juventude no Desportu (MEJD) iha ona planu atu implementa programa pilotu “Eskola iha Uma” iha munisípiu Dili hodi tulun labarik sira ho idade 3-7 ne’ebé la eskola tanba ho razaun hela dook hosi eskola.

Notísia Relevante: MEJD planeia rekruta profesór voluntáriu 444 apoiu programa eskola iha uma

Xefe suku Bemori, postu administrativu Na’in Feto, munisípiu Dili, Cristalina Pereira Soares de Oliveira, hateten ba implementasaun “Programa Eskola iha Uma” ne’e, Xefe Aldeia sira hahú ona halo identifikasaun ba labarik ho idade 3 to’o 7 iha aldeia laran.

“Ita-nia xefe aldeia sira hahú ona halo identifikasaun ba labarik sira iha aldeia laran no mós fó hatene ba joven sira-ne’ebé mak maizumenus ho nivel baxarelatu hodi tuir teste, nune’e hanorin labarik sira iha aldeia laran,” Xefe Suku Bemori ne’e hateten ba Agência TATOLI, via telefónika.

Tuir nia, progama Eskola iha Uma daudaun ne’e iha ona faze identifikasaun ba labarik sira-ne’ebé mak seidauk asesu eskola.

Xefe suku Caicoli, Hipólito Marques, hateten iha suku Caicoli ne’e xefe aldeia sira rekolla ona lista labarik sira-nian iha kada aldeia no tempu badak sira sei relata mai iha suku, nune’e labarik sira-ne’e bele tuir ensinu pré-eskolár. 

“Ita-nia xefe aldeia sira komesa rekolla ona lista labarik ne’ebé ho idade 5-7 ne’ebé mak la eskola ka iha de’it uma, hodi bele tuir programa “Eskola iha Uma” iha sede aldeia nian,” nia dehan.

Liuhosi programa Eskola iha Uma bele hanorin labarik sira matéria ne’ebé mak baibain hanorin iha ensinu pré-eskolár no halo labarik iha mentál hodi aprende hakerek, dansa, kanta no bele halo dezeñu.

Antes ne’e, Diretór Jerál Administrasaun no Finansa, Antoninho Pires, hateten Ministériu Edukasaun Juventude no Desportu (MEJD) prepara ona planu atu rekruta profesór voluntáriu 444 hodi implementa atividade ensinu aprendizajen programa eskola iha uma ba ensinu pré-eskolár no ensinu báziku 1o ano iha Dili.

“Ministériu Edukasaun Juventude no Desportu tenke aselera programa ne’e atubele hahú implementa iha munisípiu Dili. Ita-nia planu bainhira programa eskola iha uma ne’e realiza, sei halo uluk rekrutamentu ba profesór voluntáriu sira iha kada suku. Ita sei rekruta ema na’in-rua hosi kada aldeia hosi aldeia 222 iha munisípiu Dili. Ita sei presiza voluntáriu hamutuk na’in-444 hodi reforsa atividade ne’e,” Diretór ne’e informa.

Programa nasionál ne’e sei halo de’it ba labarik ho idade 3 to’o 5, ne’ebé la hetan formasaun pré-eskolár hafoin ba labarik sira hosi tinan 6 to’o 7 ne’ebé la hetan edukasaun iha ensinu báziku 1o ano, enkuantu labarik sira ne’ebé maka antes ne’e hetan ona edukasaun ka tama ona iha eskola formál, laiha direitu atu partisipa iha programa ne’e tanba sira iha ona fatin ne’ebé di’ak.

Diretór Jerál Administrasaun no Finansa, Antoninho Pires, informa programa eskola iha uma iha alokasaun orsamentu hamutuk millaun $2,3, ne’ebé prevee ona iha orsamentu retifikativu no hetan ona promulgasaun hosi Prezidente Repúblika.

Notísia Relevante: MEJD prevee millaun $2,3 atu realiza programa eskola iha uma

Jornalista :  Osoria Marques

Editór        : Cancio Ximenes

iklan
iklan

One Comment

Leave a Reply

iklan
error: Content is protected !!