iklan

HEADLINE, MUNISÍPIU, SAÚDE, VIQUEQUE

Rezultadu teste amostra ai-han iha EBF Mamulak la indika asuntu grave

Rezultadu teste amostra ai-han iha EBF Mamulak la indika asuntu grave

Administradór munisípiu Viqueque, Januário Soares ‘Bolly’. Imajen Tatoli/Vitorino Lopes da Costa

VIQUEQUE, 27 juñu 2022 (TATOLI)—Teste laboratóriu amostra ai-han merenda eskolár iha Ensinu Báziku Filiál (EBF) Mamulak, postu Viqueque vila, munisípiu Viqueque, sai ona no la indika asuntu grave ida iha ai-han.

Antes ne’e, iha loron 25 maiu 2022 bainhira estudante EBF Mamulak konsumu ai-han merenda eskolár, la kleur estudante na’in-30 sente moras no iha tuku 15:45 loron ne’e kedan parte eskola akompaña ho família lori estudante sira baixa iha ospitál internamentu.

“Ohin loron ita-nia estudante na’in-30 ne’ebé sai vítima ne’e, agora sira rekuperadu hotu ona. Hosi akontesimentu ne’e ha’u sente hahán sira-ne’e expira, maibé lori ba teste iha laboratóriu dehan laiha asuntu grave ruma iha hahán. Se hahán sira-ne’e kompañia maka prepara karik ita bele fó xamada atensaun ba sira, maibé merenda eskolár ne’e eskola sira maka jere rasik,” Administradór munisípiu Viqueque, Januário Soares ‘Bolly’, informa ba Agência Tatoli, iha ninia knaar fatin, segunda ne’e.

Notísia relevante: Eskola EBF Mamulak Viqueque provizóriu suspende atividade merenda eskolár

Laboratóriu nasionál rasik manda rezultadu teste amostra ba entidade relevante iha Viqueque.

“Rezultadu teste sampel iha laboratóriu nasionál sai ona no parte saúde munisípiu Viqueque entrega ona ba ha’u. Iha Rezultadu teste sampel ne’e hatudu katak la indika hahán sira ne’ebé estudante sira konsumu, halo labarik sira kabun moras no tama ospitál internamentu Viqueque,” nia akresenta.

Tuir Administradór, iha akontesimentu ne’e parte saúde sira rekolla kedas hahán sira ne’ebé estudante sira konsumu hanesan koto, modo mostarda no etu, rekolla bee, masin, modo inklui ema-nia muta sira, nune’e durante 24 oras lori amostra sira halo teste laboratóriu iha Dili.

Autoridade munisipál ne’e konsidera, implementasaun programa merenda eskolár presiza envolve parte saúde, liuliu parte nutrisaun hodi bele kontrolu hahán, molok estudante sira han.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!