iklan

COVALIMA, POLÍTIKA

Servisu Agrikultura garante produsaun ai-han fornese ba populasaun Covalima

Servisu Agrikultura garante produsaun ai-han fornese ba populasaun Covalima

Diretòr Servisu Agrikultura Munisípiu Covalima, Domingos Gusmão. Imajen Tatoli/Celestina Teles.

COVALIMA, 27 juñu 2022 (TATOLI)—Servisu Agrikultura no Peska Munisípiu Covalima sei kria kondisaun di’ak hodi garante hasa’e produsaun ai-han lokál hodi fornese ba populasaun Covalima, bainhira Governu sentrál implementasaun lei podér lokál no desentralizasaun administrativa.

“Ha’u-hanoin Servisu Agrikultura no Peska Munisípiu Covalima sei halo esforsu hodi kria kondisaun di’ak hasa’e produsaun ai-han lokál, bainhira Governu sentrál fó ona tempu atu ita organiza an kada munisípiu liuhosi implemensaun lei poder lokál, ita mós bele no prontu ona fornese ai-han ba ita-nia populasaun rasik,” Diretór Servisu Agrikultura no pesca Munisípiu Covalima, Domingos Gusmão, informa ba Agência Tatoli, iha nia knar fatin Tabolot, segunda ne’e.

Maske fornese ai-han ho la to’o 100% sei kontinua esforsu nafatin nune’e agrikultór sira halo produsaun iha munisípiu Covalima mesmu presija importasaun ai-han hosi rai-li’ur hodi kompleta produsaun iha rai laran.

“Ita dehan seidauk 100% ita na’in mak fornese ai-han maibé ita nafatin halo esforsu oinsá mak ai-han oioin ne’ebé ita-nia agrikultór sira kuda hanesan batar, hare, ai-farina, fehuk, talas, fore-rai, fore-keli, fore-mungu ho produtu hirak ne’e ita bele prepara ai-han rasik, mezmu ita presiza importasaun hosi rai-li’ur atu halo kompleta produtu lokál ne’ebé ita rasik produs,” nia dehan.

Atu hasa’e produsaun iha rai-laran ne’e la fasil maibé liuhosi esforsu tomak no liga mós alokasaun orsamentu kada ministériu liu-liu ba Ministériu Agrikultura no Peska kualker atividade presiza orsamentu atu fó apoiu.

“Ita hotu hatene orsamentu ba setór agrikultura kompara sira seluk orsamentu kiik tanba dirasaun boot. Ministeriu iha dirasaun hira kedas no politiku-na’in deside hanesan ne’e, ita kiik ezekuta de’it,” nia relata.

Autoridade munisipál liuhosi diploma konjunta númeru 48 hosi Ministériu Admistrasaun Estatál (MAE) no Ministériu Agrikultura no Peska (MAP) bazea ba dekretu-lei númeru 3/2016, nune’e bele aselera implementasaun lei podér lokál no desentralizasaun administrativa.

“Ha’u-hanoin Munisipiu hotu hanesan Departamentu Programa no Extensaun Agrikulola no Departamentu Pekuaria no Veterinaria entrega ona ba iha administrasuan munisipál. Tanba futuru bele konvense autoridade lokál hamutuk ho administradór munisípiu Covalima bele tau orsamentu ne’ebé sufisiente hodi bele hasa’e produsaun iha rai-laran,” nia informa.

Bele iha kondisaun atu ema halo halo servisu hodi hasa’e produsaun no bele atinje meta bainhira Munisípiu Covalima simu ona lei poder lokál, tanba Covalima preparadu duni entermu ai-han atu fornese hodi garante produsuan ai-han tanba durante ne’e agrikultór sira halo produsaun.

Agrikultór iha Covalima maioria prodús ai-han hanesan foos, fore-rai, fore-keli, fore-mungu, ai-farina, fehuk, talas no batar.

Tuir dadus hosi servisu Agrikultura no Peska Covalima iha epóka tinan 2022 produsaun batar iha Covalima hamutuk 10191.97, hosi postu administrativu sira hanesan Fatululik área potensiál 746, área kultivasaun 167,63, produtividade 1.48, produsaun tonelada 248.09, Fatumea área potensiál 1845, área kultivasaun 221, produtividade 2.31, produsaun tonelada 510.51.

Postu Administrativu Fohorem área potensiál 1211, área kultivasaun 345.28, produtividade 2.51 produsaun tonelada 866.65, Maucatar área potensiál 3353, area kultivasaun 1741, produtividade 1.86, produsaun tonelada 2338.26.

Iha postu administrative Tilomar área potensiál 1576, área kultivasaun 282.75, produtividade 2.47, produdasaun tonelada 698.39, Suai Vila área pontensiál 2894, área kultivasaun 1003, produtividade 3.43, produsaun tonelada 3440.29 no Zumalai área pontensiál 10663, área kultivasaun 539.75, produtividade 2.52, produsaun tonelada 1360.17.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!