VIQUEQUE, 27 juñu 2022 (TATOLI)–Governu liuhosi Ministériu Administrasaun Estatál (MAE), ofisialmente entrega Uma Kbiit Laek (UKL) unidade tolu ba benifisiáriu na’in-tolu hosi aldeia Bahauai, suku Uma-Uain Leten, postu administrativu Viqueque vila.
“Uma maka ne’e, imi uza ho didi’ak ba. Uma ida-ne’e maka Governu oferese ba imi hodi uza uma dignu no programa ida-ne’e ita sei kontinua nafatin,” Vise-Ministru Aministrasaun Estatál, Lino de Jesus Torrezão, hateten ba Agência Tatoli, iha suku Uma-Uain Leten, segunda ne’e.
Iha fatin hanesan, Administradór munisípiu Viqueque, Januário Soares ‘Bolly’, informa, Viqueque hetan UKL unidade 108, ne’ebé uma iha suku haat postu Viqueque inaugura ona.
“Ha’u agradese ba Vise-Ministru ne’ebé mai inaugura UKL iha suku Uma-Uain Leten. Iha munisípiu Viqueque, iha suku haat maka inaugura ona no suku seluk maka sei iha prosesu nia laran. Ida-ne’e maka ha’u informa ba públiku,” nia dehan.
Notísia relevante: Progresu konstrusaun UKL Viqueque atinje 70%
Iha okaziaun ne’e, Xefe suku Uma-Uain Leten, Martinho S. Gusmão, apresia ba Governu ne’ebé oferese ona uma dignu no seguru ba povu.
“Husu nafatin ba Governu hodi kontinua nafatin programa sira-ne’e, hodi bele liberta povu sira ne’ebé laiha kibit hodi halo uma,” nia tenik.
Nia dehan, planu konstrusaun uma UKL loloos fulan-tolu hahú agostu to’o novembru 2021, maibé dezafiu ba mobilizasaun materiál maka sai dezafiu tanba ne’e maka foin finaliza iha juñu 2022.
Iha biban ne’e, Reprezentante no beioan hosi benefisiáriu Antónia Soares da Costa, Alex Soares, sente kontente tanba bele hetan uma dignu ida, maski oras ne’e ninia avo laiha ona.
“Maski oras ne’e avo laiha ona mundu, maibé uma ne’e ami beioan sira maka sei uza,” nia dehan.
Benifísiariu na’in-tolu hosi suku Uma-Uain Leten maka hanesan Antónia Soares da Costa, Maria Almeida no Olinda da Cruz, ho kustu ba konstrusaun hamutuk $ 49.100 ba kada uma.
Serimónia inaugurasaun UKL iha suku Uma-Uain Leten hetan partisipasaun hosi komunidade, veteranu no Administradór postu Viqueque vila, Komadante Eskuadra Polísia Nasionál Timor-Leste (PNTL) postu Viqueque vila, Xefe suku Macadique, akompaña hosi Reprezentante hosi Programa Nasionál dezenvolvimentu suku (PNDS).
Jornalista : Vitorino Lopes da Costa
Editora : Julia Chatarina
