iklan

DILI, POLÍTIKA

Bankada PD-CNRT: reajusta PED presiza iha konsensu polítiku

Bankada PD-CNRT: reajusta PED presiza iha konsensu polítiku

Deputadu PD, Adriano do Nascimento. Foto TATOLI

DILI, 28 juñu 2022 (TATOLI)–Deputadu hosi bankada opozisaun Partidu Demokrátiku (PD) ho CNRT iha Parlamentu Nasionál (PN), hanoin reajustamentu Planu Estratéjiku Dezenvolvimentu (PED) 2011-2030 presiza iha konsesu entre partidu polítiku no entidade hotu iha rai-laran.

Notísia Relevante: José Reis husu halo reflesaun iha implementasaun PED 2011-2030

Deputadu Partidu Demokrátiku (PD), Adriano do Nacimento, hateten se Governu hola inisiativa atu halo revizaun ne’e di’ak tanba se ko’alia kona-ba planu estratéjiku ne’ebé uluk PD mós hamutuk ho CNRT hola inisiativa atu halo, maske nune’e hosi 2011 to’o agora presiza halo ajustamentu.

“Hanoin presiza konsensu polítika atu nune’e VIII Governu Konstitusionál halo. Se laiha konsesu, aban bainrua Governu seluk mai fali ukun muda fali ida-ne’e, entaun ita laiha buat ida kontinuidade Estadu,” Deputadu Adriano Nascimento hateten ba Agência Tatoli iha Parlamentu Nasionál, tersa ne’e.

Tuir nia, ajustamentu iha buat rua ne’ebé Governu no partidu ne’ebé (s’e) de’it bele halo haree didi’ak iha Planu Estratéjiku Dezenvolvimentu (PED) 2011-2030.

Hanesan ba dahuluk halo ajustamentu tanba situasaun nasaun iha kondisaun ekonomika, finanseira, sosiál, polítika entaun presiza halo ajustamentu.

Daruak mak tenke halo guia implementasaun tanba PED seidauk iha entaun presiza, nune’e bainhira halo ajustamentu no iha ona guia implementasaun mak terseiru pasu iha ona konsensu entre partidu no lidér polítiku sira hotu.

“Ho nune’e, aban bainrua partidu ida-ne’ebé de’it kaer ukun, nia tau de’it ona prioridade hakarak halo saida mak uluk hanesan iha saúde, edukasaun, infraestrutura. Maibé lidér partidu sira no parte hotu tenke iha konsensu halo planu no ninia guia implementasaun,” nia hateten.

Nia dehan, implementasaun PED durante ne’e la’o maibé iha parte balun mós la’o dezorganizadu tanba partidu ida kaer ukun no aat liu Governante sira-ne’ebé laiha ida-idak hakarak nesesidade polítika halo ida-ne’e no halo ida-ne’eba.

“Ezemplu seluk mak ita iha Dili ne’ebé tuir loloos halo ona planu urbanu agora. Uluk ami ko’alia ida-ne’e, maibé agora foho lolon sira komesa mesak uma  ona. Hanesan uluk ami ko’alia iha 2008, ko’alia kona-ba pur ezemplu Kintal Boot, Caicoli, Becora tau saida, ida-ne’e mak seidauk iha. Maibé agora ita komesa dezorganizadu komesa harii baraka no foho lolon uma nakonu, ida-ne’e ita atu hasai sira kustu karun,” nia dehan.

Vise Bankada CNRT, Patrocínio Fernandes, hateten PED hanesan planu ida ba kontein kurtu médiu no longu prazu, loos duni ohin loron tama ona ba tempu presiza atu haree fila-fali ba halo avaliasaun ba implementasaun.

Buat ne’ebé CNRT hanoin relevante liu atu halo mak ita halo uluk avaliasaun ruma kona-ba implementasaun PED mak depois kurizi buat balun ne’ebé saida mak Timor-Leste atinje ona no saida mak seidauk no presiza hadi’a ida-ne’ebé.

“Planu estratéjiku hanesan konsensu nasionál mezmu iha tempu ne’eba Fretilin la konkorda ho planu ne’e sira walk out iha aprovasaun, maibé ida-ne’e hanesan dokumentu Estadu nian. CNRT nia polítika defende planu estratéjiku ne’e no rekuñese atu halo revizaun avaliasaun ba parte balun ne’ebé presiza karik atu ajusta ba ita-nia realidade,” nia hateten.

Tanba ne’e, nia dehan, avaliasaun ne’e importante maibé atu halo inisiativa ruma atu substitui PED hanoin seidauk iha ninia tempu atu halo planu ruma subtitui buat hotu kontempla ona iha dokumentu ne’e, nune’e presiza haree ajusta de’it buat balun ne’ebé ladún relevante ona ba Timor-Leste nia realidade.

Tan ne’e, nia hateten, depende ba vontade polítika ba partidu sira-ne’ebé agora kaer Governu oinsá halo reajustamentu ne’e konsensu ho parte hotu.

Prezidente Bankada Fretilin, David Dias Ximenes “Mandati”, PED tinan hirak liu ba halo tiha ona maibé iha dinámika tempu oinsá mak bele adapta ba situasaun ohin loron, nune’e presiza reajusta.

“Planu estratéjiku nia implementasaun durante ne’e la’o hela no iha mós la la’o tuir planu ne’ebé iha tanba parese la adaptavel. No, ami Parlamentu Nasionál la’ós ezekuta planu ne’e, lae, maibé fiskaliza de’it no ezekutivu sira mak hala’o. Ne’ebé ami-nia haree mak ida-ne’e karik iha atu hadi’a no hasai buat ruma ne’e tanba kestaun tempu dinámika,” nia dehan.

Tanba ne’e, nesesariu hala’o hodi halo mós avaliasaun ida-ne’ebé mak ultrapasa oinsá hadi’a liután.

Nune’e, Deputadu Bankada Governu ne’e, konkorda oinsá bele iha konsensu polítiku entre partidu sira no parte hotu ba reajustamentu ba Planu Estratéjiku Dezenvolvimentu (PED) 2011-2030.

Notísia Relevante: Governu halo reajustamentu PED 2011-2030 hodi re-define metas

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!