iklan

HEADLINE, MUNISÍPIU, VIQUEQUE

Benifisiáriu UKL suku Builale Viqueque agradese ba Governu

Benifisiáriu UKL suku Builale Viqueque agradese ba Governu

Benefisiáriu UKL, Elisa Monteiro Hornai. Imajen Tatoli/Vitorino Lopes da Costa

VIQUEQUE, 28 juñu 2022 (TATOLI)–Benefisiáriu Uma Kbiit Laek (UKL), Elisa Monteiro Hornai, agradese ba Governu tanba oferese ona uma ba nia iha aldeia Henu-Uta, suku Builale, postu administrativu Ossu, munsípiu Viqueque.

“Ami agradese ba Governu ne’ebé oferese ona UKL ba ami no ami simu ho liman-rua. Durante ne’e ami kbiit laiha hodi halo uma hanesan uma ne’ebé Governu oferese ona ba ami. Ha’u feto mesak no família sira mós haree ha’u ladi’ak, maibé agora Governu entrega ona uma ba ha’u uza,” Benefisiáriu UKL hateten ba Agência Tatoli, iha serimónia inagurasaun UKL unidade tolu, iha suku Builale, tersa ne’e.

Notísia relevante: Progresu konstrusaun UKL Viqueque atinje 70%

Durante prosesu konstrusaun, benefisiáriu UKL kontribui mós serbisu hamutuk ho badaen sira hodi  halo konstrusaun uma to’o finaliza.

“Ami mós fó apoiu serbisu hamutuk ho badaen sira. ohin loron finaliza ona no ami simu ho kontente tanba daudaun ne’e ami bele utiliza ona uma,” nia akresenta.

Hafoin ramata inaugurasaun uma unidade tolu iha suku Builale, Vise-Ministru Adiministrasaun Estatal (MAE), Lino Torezão de Jesus, hateten, programa VIII Governu ida maka atu halo uma ba povu sira ne’ebé kbiit la to’o hodi halo sira-nia uma.

“Tanba ne’e, Governu tau ba programa halo uma ba sira hodi hela ba. Ho ida-ne’e VIII Govenu mai ho ninia programa no orsamentu rasik hodi  halo uma dignu ba ita-nia povu hodi uza. Uma ne’ebé Governu halo ne’e benefisiáriu sira-nia, tanba ne’e tenke uza ho kuidadu nafatin tanba Governu oferese ona,” governante ne’e apela.

Iha biban hanesan, Xefe suku Builale,  António Gomes Moniz, apresia ho prezensa membru Governu iha serimónia ne’e.

“Ha’u agradese ba Vise-Ministru ne’ebé hakat mai ami-nia suku hodi halo inagurasaun ba UKL iha suku ne’e. Ami prontu nafatin simu kualker programa sira hosi PNDS,” nia tenik.

Benefisiáriu UKL iha suku Builale maka hanesan Elisa M. Hornai, Celestino da Costa Belo no Joana da Silva, ho montante totál ba uma unidade tolu hamutuk $ 51.000.

Serimónia ne’e partisipa mós hosi autoridade lokál, veteranu no kominidade suku Builale.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!