iklan

KAPITÁL, POLÍTIKA

CNC fó formasaun istória luta direitu umanu ba guarda prizionál Becora

CNC fó formasaun istória luta direitu umanu ba guarda prizionál Becora

Diretór Ezekutivu Centru Nacionál Chega (CNC), Hugo Maria Fernandes. Imajen Tatoli/Francisco Sony.

DILI, 28 junu 2022 (TATOLI)—Centro Nacional Chega (CNC), tersa ne’e, fó formasaun kona-ba istória luta direitu umanu iha Timor-Leste (TL) ba guarda prizionál Becora atu labele repete violasaun direitu umanu hanesan violasaun kruel ne’ebé akontese iha funu hahú hosi 1974 to’o 1999 ne’e.

Notísia Relevante: CNC disemina rekomendasaun relatóriu “Chega” ba PNTL

“Ita fiar katak, komunidade iha nível kraik liu, sira hatene ona saida mak relatóriu Chega! no saida mak CNC halo. Entaun, komesa agora ita ba halo formasaun ba ho entidade públiku sira, liu-liu entidade públiku sira-ne’ebé iha tempu pasadu okupasaun Indonézia sira mós hola parte balun iha violasaun direitu umanu sira-ne’ebé akontese. Entaun, ho ida-ne’e ita hakarak iha Timor ne’ebé ukun an, ita-nia PNTL, F-FDTL, Guarda Prizionál sira no Autór Judisiáriu sira iha emosaun di’ak kona-ba direitu umanu, entaun iha sira-nia servisu sira bele halo atendimentu ida di’ak,” Diretór Ezekutivu Centro Nacional Chega (CNC), Hugo Maria Fernandes, hateten ba jornalista sira, iha Prizaun Becora, Díli, tersa ne’e.

Nia informa, iha 2019 CNC halo nota entendimentu ida ho Ministériu Justisa (MJ) no iha konteúdu ne’e atu hala’o programa kona-ba protesaun ba fatin istóriku, sertidaun RDTL ba oan sira hosi vítima violasaun seksuál pasadu no formasaun.

“Iha formasaun, tinan ida-ne’e mak ita foin halo ba funsionáriu públiku hotu-hotu, ba membru PNTL sira ne’ebé hahú hosi UPM munisípiu Dili no agora dadauk atu ba fali UPF (Unidade Polísia Fronteira) no Guarda Prizionál sira iha Díli, Ermera no Suai. Entaun, ita halo ida-ne’e tanba ita halo ona diseminasaun barak liu ho komunidade hosi nível nasionál to’o iha suku,” nia dehan.

Iha tinan ne’e no ba oin, CNC sei konsentra ba entidade públiku sira iha Dili, atu nune’e sira mós bele hatene istória luta direitu umanu iha Timor-Leste.

Diretór Nasionál Servisu Prizionál no Reinsersaun Sosiál, Amlicar Soares Seixas, hateten objetivu hosi formasaun ne’e atu profunda relasaun servisu entre Centro Nacional Chega (CNC) ho Ministériu Justisa.

“Ohin, hanesan onra boot ida sira (CNC) mai fó formasaun ba Guarda Prizionál sira. Tuir kalendáriu formasaun ne’e ohin hala’o iha Becora ba loron tolu, nune’e agostu iha Gleno no outubru iha Suai. Ho formasaun hanesan para atu bele implementa buat ne’ebé tuir direitu umanu, labele akontese buat ne’ebé pasadu nian. Ida-ne’e mak CNC nia objetivu fundamentál mai fó formasaun atu fanu fali guarda sira iha prizaun sira hala’o knar ho responsabilidade no maneira ne’ebé dignu no respeita direitu umanu,” nia dehan.

Tuir nia, formasaun istória luta direitu umanu iha Timor-Leste (TL), ne’e importante ba Guarda Prizionál sira iha Timor-Leste hodi haluha tempu pasadu ho violasaun direitu umanu ne’ebé kruel ne’e.

“Hanesan ohin diretór CNC hateten katak istória pasadu nakonu ho violasaun direiru umanu. Tanba ne’e, ohin ita hakarak kuda metin ita-nia istória atu relembra fila-fali memória ba kotuk atu ba oin ita haree malu hanesan maun no alin, hodi labele komete tan violasaun direiru uamanu,” nia dehan.

Entretantu, Guarda Prizionál sira-ne’ebé partisipa iha formasaun kona-ba istória luta direitu umanu iha Timor-Leste (TL) ne’e ema na’in-20-resin.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!