BOBONARO, EKONOMIA, HEADLINE, INKLUZAUN SOSIÁL, MUNISÍPIU, SOSIEDADE SIVĺL

Ema ho defisiénsia na’in-40 iha Bobonaro asesu ona subsídiu

Ema ho defisiénsia na’in-40 iha Bobonaro asesu ona subsídiu

Diretór Ezekutivu Asosiasaun Halibur Defisiensia Rejiaun Oeste, Sebastião de Fátima. Imajen Tatoli/Sérgio da Cruz.

BOBONARO, 28 juñu 2022 (TATOLI) – Diretór Ezekutivu Asosiasaun Defisiénsia Rejiaun Oeste (AHDRO), Sebastião de Fátima, hateten bazea ba rezultadu peskiza identifika ema ho defisiénsia hamutuk na’in-40 iha munisípiu Bobonaro asesu ona subsídiu invalidéz.

“Durante ne’e ami halo serbisu maka’as hodi rejistu ema ho defisiénsia ne’ebé mak seidauk asesu subsídiu no sira-ne’ebé asesu ona, entaun dadus ne’ebé ami identifika liuhosi peskiza mak ema na’in-40 mak foin asesu subdísiu,” nia informa ba Agência Tatoli, iha Maliana, tersa ne’e.

Notísia relevante:Ministériu sira tenke prevee osan ba PAN haree asuntu Ema ho Defisiénsia

Diretór ne’e dehan, hosi ema na’in-40 ne’e barak AHDRO mak fasilita maibé iha balun hola inisiativa ba trata rasik dukumentu sira hanesan, atestadu médiku, foti deklarasaun suku hodi rejista rasik iha serbisu sosiál munisípiu Bobonaro atubele hetan direitu.

Nia haktuir, dadus provizóriu ne’e sei rekolla de’it iha postu administrativu sira-ne’ebé besik tanba hasoru difikuldade kona-bá transporte nune’e seidauk bele kobre hotu iha postu administrativu sira.

Maibé nia garante la hela de’it ho dadus ema na’in-40 ne’e maibé sei kontinua halo identifikasaun to’o baze hodi kumpre AHDRO nia ezistensia dezde 2015 mai to’o agora ho objetivu luta ba asuntu ema ho defisénsia direitu iha munisípiu Bobonaro.

“Sira balu dehan maske defisiénsia maibé hakrak esforsu-aan mesak, lakohi atu depende hela de’it ba ema seluk, depois sira fó fali rezultadu mai ami kona-bá trata dokumentu sira-ne’e, ami mós fó hanoin fali kona-bá buat ne’ebé sei falta ami fasilita sira,” nia katak.

Nia fó-sai katak, Bobonaro iha ema ho defisiénsia na’in-400, hosi númeuru ne’e na’in-40 mak foin asesu direitu subsídiu.

Nia dehan, kritéria ba ema ho defisiénsia ho idade 18 ba leten mak simu subsídiu ida-ne’e, tanba bazea ba artigu 6 hosi dekretu-lei númeru 19/2008, kona-ba kondisaun atribuisaun subsídiu apoiu ba invalidéz.

Notísia Relevante:MSSI sei harii Konsellu Nasionál responde PAN ba Ema ho Defisiénsia

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!