iklan

COVID-19, EKONOMIA, HEADLINE

Komunidade konsidera programa Cesta Bázika reforsa nesesidade familiár

Komunidade konsidera programa Cesta Bázika reforsa nesesidade familiár

Produtu Cesta Bázika. Imajen TATOLI/Antónia Gusmão.

DILI, 28 juñu 2022 (TATOLI)–Komunidade inklui autoridade lokál hosi aldeia Fomento II, suku Comoro, postu administrativu Dom Aleixo, munisípiu Dili, sente kontente ho programa Cesta Bázika faze daruak tanba bele reforsa nesesidade família nian.

“Hakarak fó apresiasaun boot ba polítika VIII Governu Konstitusionál tanba hamosu programa insentiva no subsídiu barak ne’ebé bele benefisia povu Timor-Leste liuhosi Orsamentu Jerál Estadu (OJE) 2022,” Xefe aldeia Fomento II, Maculado da Conceição Doutel Pereira, hateten, liuhosi nota ne’ebé Agência Tatoli asesu hosi Gabinete Ministériu Turizmu, Komérsiu no Indústria (MTKI), segunda ne’e.

Notísia relevante: Governu lansa distribuisaun Cesta Bázika faze daruak iha aldeia Baia Leste

Autoridade komunitáriu ne’e konsidera programa nasionál ne’e fó vantajen di’ak tanba maioria utiliza produtu lokál no pursentu oitoan de’it mak importa hosi rai-li’ur.

“Ida-ne’e meiu ne’ebé ajuda tebes ekonomia rai-laran, hasa’e kapasidade kompra no sirkulasaun moeda iha rai-laran. Alende ne’e motiva agrikultór sira reforsa produsaun ai-han. Maski iha komunidade balun kestiona iha produtu manu-tolun balun a’at, maibé la fó impaktu ba prosesu distribuisaun,” nia akresenta.

Komunidade iha aldeia Fomento II barak mak kbiit laek, nune’e ho programa ne’e bele reforsa tan sira-nia ekonomia família.

Nune’e, autoridade lokál garante katak kada tinan bainhira Governu kontinua prevee orsamentu ba programa Cesta Bázika ba oin, empreza sira sei investe iha setór agrikultura no hamosu postu traballu barak.

Benefisiáriu, Maria Fátima Doutel, agradese ba Governu tanba bele fahe produtu ne’ebé bele ajuda nesesidade loron-loron, maski la’ós iha tempu tomak.

Nune’e mós, Reprezentante empreza Leader Lda, Pascoal Suri Mali, hateten, empreza enfrenta difikuldade ho presu, tanba bainhira Governu orsamenta presu iha merkadu seidauk sa’e, maibé iha tinan 2022 presu produtu importasaun no rai-laran kuaze sa’e maka’as.

“Ami prontu asume responsabilidade distribui nafatin produtu Cesta Bázika tuir prosesu normál,” nia promete.

Aleinde ne’e, empreza ne’e sujere ba Governu no autoridade lokál atu rezolve dadus reklasamasaun nune’e labele iha tan problema hanesan iha terrenu.

Empreza Leader, Lda distribui ona ba komunidade iha Baia-Leste, Fomento II no sei kontinua distribui ba Fomento I no III iha suku Comoro, Dom Aleixo.

Benefisiáriu Cesta bázika iha aldeia Fomento II, suku Comoro hamutuk uma-kain 618, ho totál populasaun 3.238, reklamante na’in-50, maski nune’e ekipa hosi ministériu implementadór halo esforsu nune’e tempu tuir mai komunidade hirak ne’ebé mak seidauk hetan direitu bele hetan hikas.

Jornalista  : Antónia Gusmão

Editora       : Julia Chatarina

iklan
iklan

Leave a Reply

iklan
error: Content is protected !!