iklan

HEADLINE, MUNISÍPIU, VIQUEQUE

MPO sosializa ordenamentu territóriu ba diretór liña ministeriál iha Viqueque

MPO sosializa ordenamentu territóriu ba diretór liña ministeriál iha Viqueque

Atividade sosializasaun ordenamentu territóriu, iha salaun munisípiu Viqueque, tersa (28/06). Imajen Tatoli/Vitorino Lopes da Costa

VIQUEQUE, 28 juñu 2022 (TATOLI)–Ekipa hosi Ministériu Planu Ordenamentu (MPO), tersa ne’e, halo sosializasaun kona-ba ordenamentu territóriu ba diretór liña ministeriál sira iha munisípiu Viqueque.

“Ohin ami halo sosializasaun kona-ba planu ordenamentu territóriu ne’e atu halo kontinusaun ba diretór munisípiu no diretór liña ministeriál sira iha munisípiu Viqueque,” Diretór Nasionál Ordenamentu Espesiál hosi Ministériu Planu no Ordenamentu (MPO), Casio Lei Ximenes, hateten ba  Agência Tatoli, hafoin ramata atividade, iha salaun munisípal, tersa ne’e.

Notísia relevante: MPO estabelese grupu tékniku planu ordenamentu territóriu iha Baucau

Antes ne’e, pre-sosializasaun MPO realiza ona tinan 2021 no planu sira ne’ebé sei presiza implementa hosi parte munisípiu Viqueque tama iha pakote daruak hamutuk ho munisípiu Baucau no Lautém.

“Iha planu ordenamentu territóriu ne’e, pakote dahuluk maka munisípiu Ermera no Bobonaro, ne’ebé Governu deside ona atu halo planu ordenamentu munisipál,” nia akresenta.

Nia dehan, atividade sosializasaun kontinua hosi despaixu ne’ebé asina hosi Ministru Ordenamentu Territóriu kona-ba determinasaun elaborasaun planu.

“Ohin forma ekipa serbisu atu fasilita atividade karakterizasaun ba munisípiu Viqueque hodi bele hetan informasaun klaru kona-ba monitorizasaun. Kona-ba  karakterizasaun ne’ebé ita iha, ezemplu  hanesan  rekursu naturál, rekursu umanu, no infraesturua liga ba estrada, hafoin ita haree no halo diagnóstika durante tinan 20, dezafiu saida maka ita hasoru hodi hadi’a fali planu ordenamentu territóriu, nune’e ba futuru munisípiu Viqueque bele estabelese rasik ninia planu estratéjiku dezenvolvimentu,” nia esplika.

Ekipa serbisu ne’ebé forma ona kompostu hosi Diretór Agrikultura munisípiu Viqueque, Diretór Saúde, juventude rezistensia, veteranu no lia-na’in sira, atu kontribui ba diagonóstika hodi define modelu ordenamentu Viqueque.

Iha fatin hanesan, Administradór munisípiu Viqueque, Januário Soares ‘Bolly’, husu partisipante sira tau-atensaun ba esplikasaun ekipa MPO.

“Nune’e ita bele haree ita-nia misaun no vizasaun ba munisípiu Viqueque hodi bele kompriende no karik iha futuru implementa ita bele hatene ita-nia knaar,” nia hato’o.

Dadus área jeografia munisípiu Viqueque hamutuk 1.850, kompostu hosi postu Lacluta 308, Ossu 392, Uatulari 236, postu Uatucarbau 165 no Viqueque vila 749.

Jornalista  : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!