iklan

HEADLINE, SAÚDE

MS presiza teste kualidade ai-moruk molok distribui ba sentru saúde sira

MS presiza teste kualidade ai-moruk molok distribui ba sentru saúde sira

Aimoruk Dexamethasone tablet hosi India.Imajen/Espesial

DILI, 28 juñu 2022 (TATOLI)— Responsavél Farmásia Sentru Internamentu Vera-Cruz, Idelfonso do Santos, hateten Governu liuhosi Ministériu Saúde tenke halo teste ba kualidade ai-moruk sira, molok distribui ba sentru no postu saúde sira iha territóriu nasionál.

“Ministériu Saúde halo teste ba ai-moruk sira ne’e tarde liu. Tanba loloos Governu tenke teste uluk lai kualidade aimoruk molok distribui ba sentru saúde sira. La’ós pasiente sira konsumu hotu ona mak foin teste no deklara sai. Ita fó hotu ona pasiente mak foin dehan kualidade laiha,” Resposavél ne’e hateten ba Agência TATOLI iha knar fatin, Caicoli, tersa ne’e.

Notísia relevante:  SAMES distribui aimoruk dexamethasone-simvastatin tablet 245.000 ba fasilidade saúde sira

Iha fulan fevereiru tinan ne’e, Servisu Autónomu Medikamentu no Ekipamentu Saúde (SAMES) distribui ai-moruk dexamethasone no simvastatin hosi Índia ne’e hamutuk tablet 3.000.

“Ai-moruk ne’e, ita fó hotu ona ba pasiente no konsumu hotu ona inklui estoke mamuk ona mak Ministériu Saúde fó sai informasaun katak aimoruk tipu rua laiha kualidade,” responsavél ne’e lamenta.

Maski nune’e, Responsavél ne’e dehan pasiente ne’ebé simu ai-moruk ne’e laiha ida mak mai deklara katak sira konsumu aimoruk ne’e hetan efeitu ruma.

Iha fatin ketak, Responsavel Farmásia Sentru Saúde Formoza, Carolina Soares do Santos, informa simu ona despaisu hosi Ministériu Saúde atu labele fó ona ai-moruk dexamethasone no simvastatin hosi Índia ba pasiente sira tanba laiha kualidade.

“Ami simu karta formal, iha loron 22 juñu, atu suspende ai-moruk tipu dexamethasone no simvastatin hosi Índia. Maibé estoke mamuk iha fulan kotuk,” Responsavel ne’e hateten ba Agência TATOLI iha kna’ar fatin sentru saúde Formoza, tersa ne’e.

SAMES konsege distribui ai-moruk simvastatin no dexamethasone tablet 5.000, kompostu simvastatin tablet 4.000 no dexamethasone tablet 1.000, maibé estoke mamuk ona tanba fó hotu ona ba pasiente sira.

“Médiku sira fó ba pasiente laiha reasaun tanba laiha ema ida mak mai hateten ai-moruk dexamethasone no simvastatin ami hemu la di’ak,” nia afirma.

Daudaun ne’e, Sentru saúde Formoza troka ai-moruk dexamethasone no simvastatin hosi India hodi fó fali ai-moruk ba pasiente sira ho tipu hanesan, maibé mai hosi nasaun Indonézia no Canada.

“Ami nia ai-moruk dexamethasone tablet 1000 no simvastatin tablet 500 hosi nasaun Indonézia no Canada mak iha farmásia ne’e hodi fó ba pasiente sira,” nia afirma.

Entretantu, Diretór Klíniku Hospitál Nasionál Guido Valadares (HNGV), Marcelino Correia, hatutan suspende ona ai-moruk tipu rua ne’ebé laiha kualidade hodi labele fó ba pasiente .

“Simvastatin ho dexamethasone ne’ebé mak mai husi India ne’e mak ita nia farmasia sira suspende ona, maibé mai hosi Indonésia ho nasaun seluk ne’e ita uza nafatin,” nia informa.

Daudaun, Farmásia HNGV hahú rekolla no asegura ai-moruk tipu rua ne’e atu tempu badak bele halo destruisau.

“Ha’u la lembra ai-moruk nia kuantidade, maibé sira rai ona iha fatin ida atu asegura hodi  tempu badak ba destrui,” tenik nia.

Notísia relevante: Laiha kualidade, MS apela labele fó aimoruk “dexamethasone no Simvastatin” ba pasiente

Jornalista: Felicidade Ximenes

Editór     : Florencio Miranda Ximenes

iklan
iklan

Leave a Reply

iklan
error: Content is protected !!