iklan

COVALIMA, SAÚDE

Pesoál saúde 46 iha Covalima nia kontratu sei ramata

Pesoál saúde 46 iha Covalima nia kontratu sei ramata

Servisu Saúde Munisípiu Covalima, Maria Fatima Moniz. Imajen Tatoli/Celestina Teles.

COVALIMA, 28 juñu 2022 (TATOLI)–Diretora Servisu Saúde Covalima, Maria de Fátima Moniz, hateten Pesoál Saúde na’in-46 iha Covalima nia kontratu sei ramata iha fulan-juñu nia rohan.

Notísia Relevante: MS loke vaga 116 urjente ba públiku atu apoia izolamentu

“Ita iha ne’e pesoál saúde na’in-46 ne’ebé sira-nia kontratu ramata ona, maibé ami esforsu haruka ona karta ba Ministériu Saúde atu extende sira-nia kontratu bazea ba nesesidade servisu iha terrenu,” Maria de Fátima Moniz informa ba Agência Tatoli, iha nia knaar fatin, tersa ne’e.

Razaun husu Ministériu Saúde atu extende Pesoál Saúde na’in-46 nia kontratu tanba sira ne’e apoiu servisu saúde durante iha tempu pandemia COVID-19 no mós halo kampaña vasina hodi hatudu nia rezultadu Covalima akupa primeiru lugar iha territóriu nasionál kona-ba vasina Astrazeneca.

“Haree ba ita-nia nesesidade tuir planu ministériu saúde, iha postu saúde sira iha Covalima presiza iha médiku, enfermeiru, parteira ida no mós tekniku aliadu ida, maibé tanba de’it orsamentu la sufisiente atu kontinua sira-nia kontratu,” nia dehan.

Pesoál na’in 46 ne’e kompostu hosi médiku na’in-ida (1), enfermeiru na’in-12, saúde públiku 13, parteira haat (4), analista rua (2),  motorista haat (4), farmasia rua (2), cleaner hitu (7) ne’ebé sira nia kontratu sei ramata iha fulan-juñu nia rohan.

“Hafoin Timor-Leste livre hosi COVID-19, médiku no pesoál saúde sira-ne’e, ami koloka hala’o servisu iha sentru saúde no postu saude 24 iha Covalima ne’ebé balun seidauk iha médiku, enfermeiru no parteira,” nia hateten.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!