BAUCAU, 28 juñu 2022 (TATOLI) – Sekretariadu Tékniku Administrasaun Eleitorál (STAE) Munisípiu Baucau, rejista eleitór foun na’in-424.
STAE Munisípiu Baucau rejista eleitór foun 424 ne’e hafoin eleisaun prezidensiál to’o fulan-juñu.
Diretór SATE Munisípiu Baucau, Lúcio Freitas Salvador, esplika, daudaun ne’e atividade rútina mak resensiamentu eleitorál no atualizasaun baze dadus ne’ebé sei sentraliza iha munisípiu.
“Antes ne’e ita rejista 95.708, agora totál hamutuk eleitór na’in-96.132 tanba ita aumenta eleitór foun hamutuk 424,” Diretór STAE Baucau ne’e ko’alia iha Baucau, tersa ne’e.
Eleitór foun hirak-ne’e mai hosi joven ho idade tinan 17 no sira-ne’ebé muda hela-fatin.
Nia informa, sidadaun hirak-ne’ebé idade tinan 17 bainhira trata kartaun eleitorál presiza kompleta dokumentu hanesan deklarasaun xefe suku no lori dokumentu kompementár tolu seluk hanesan sertidaun RDTL, Billete Identidade (BI) no pasaporte.
Enkuantu ba sira-ne’ebé atu atualiza kartaun eleitorál presiza dokumentu komplementár tolu seluk hanesan sertidaun RDTL, BI, pasaporte no sira-ne’ebé kartaun lakon presiza deklarasaun hosi polísia.
STAE Munisípiu Baucau resensia eleitór foun bazea ba Lei númeru 19/2021, 8 setembru-alterasaun dahuluk hosi Lei númeru 6/2016, 25 maiu (Lei Resensiamentu Eleitorál). Resensiamentu eleitorál ne’e obrigatóriu, ofisiozu, úniku no universál, sempre atualizadu hodi hasoru kada eleisaun.
Notísia relevante: STAE Baucau hahú atividade resensiamentu eleitorál
Jornalista : Natalino Belo
Editór : Evaristo Soares Martins
