BAUCAU, EDUKASAUN, HEADLINE, MUNISÍPIU, POLÍTIKA

AMRT rekolla istória funu hosi testemuña na’in-74 iha Bucoli

AMRT rekolla istória funu hosi testemuña na’in-74 iha Bucoli

Testemuña oral sira entrega dokumentu luta ba Sekretáriu Jerál CMCLN Baucau, Manuel Alari da Costa Soares, iha sede suku Bucoli, kuarta (29/06). Imajen Tatoli/Natalino Belo.

BAUCAU, 29 juñu 2022 (TATOLI) – Arkivu Muzeu no Rezisténsia Timorense (AMRT), kuarta ne’e rekolla istória funu hosi testemuña na’in-74 iha suku Bucoli, postu administrativu Baucau Vila, munisípiu Baucau.

Diretór Ezekutivu AMRT, Hamar Antoninho Baptista Alves, esplika, muzeum rezisténsia hanesan fatin prezervasaun memória luta hosi autór sira-ne’ebé luta ba libertasaun pátria nune’e hato’o agradesementu ba autoridade suku Bucoli no komunidade sira tanba kolabora ona hodi realiza rekollamentu dokumentu rezisténsia durante loron-14.

Dokumentu sira-ne’ebé entrega hosi testemuña na’in-14 ba AMRT iha suku Bucoli, Kkarta (29/06). Imajen Tatoli/Natalino Belo.

“Ha’u hato’o agradese no urgullu ba ita-boot sira atu rai hela testemuña ba rai doben ida-ne’e ba oan no bei-oan sira atu asesu iha future,” Diretór Ezekutivu AMRT hateten iha Bucoli.

Hamar esplika, AMRT harii hosi estadu Timor-Leste iha loron 7 dezembru tinan-2005 ho objetivu misaun atu prezerva memória reziténsia hanesan rekolla dokumentu funu iha rai-laran no rai-li’ur hosi autór sira-ne’ebé partisipa iha luta libertasaun nasionál.

AMRT rekolla ona dokumentu hamutuk rihun 50, objetu no fotografia, rihun 15 mak lansa no asesu públiku, enkuantu restante sei iha prosesu tratamentu inklui klasifikasaun.

Reprezentante testamuña atuál Koordenadór Sentru Pilotu Numeru II Bucoli, Carlos Baptista Pinto, hateten, ema bele diferénsa maibé mesak ida-de’it tanba objetivu atu defende nasaun Timor-Leste nune’e istória ema hotu iha maibé sempre akontese dala-ida de’it iha moris.

Sentru pilotu númeru II nunka hanorin nia ema atu fahe, hirus malu maibé liuhosi Saudozu Vicente Reis ‘Sahe’ hanorin ema atu serbisu, fó liman hamutuk tanba iha istória ida-de’it.

“Dokumentu sira-ne’ebé iha tempu ona entrega ba AMRT atu halo prezervasaun tanba ita ema sei mate maibé jerasaun tuir mai sei haree no buka hatene kona-ba aman nia luta iha muzeu reziténsia,” Carlos Pinto akresenta.

Bucoli durante períodu luta ba prosesu luta sai sentru pilotu II iha sentru leste ne’ebé lidera direita hosi saudozu Vicente Reis ‘Sahe’ antes invazaun Indonézia iha tinan 1975.

AMRT durante loron-14 rekolla istória funu hosi totál testemuña orál hamutuk na’in-74 no rekolla dokumentu hosi testamuña na’in-15 hanesan dokumentu estrutura Nureb Bucoli, sentru formasaun polítika sentru leste 1975.

Nune’e mós kópia manuál programa polítika FRETILIN 1979, munisaun, buletin votu konsulta populár 1999, baioneta (tudik) apelu oan kiak, lista kontribuisaun, osan rupiah, cruz vermella, formulariu rekomendasaun no seluk tán.

Partisipa iha serimónia ne’e Prezidente Autoridade Munisípiu Baucau, Olívio ‘Bou-Lesa’ Freitas, Komandante Polísia Nasionál Timor-Leste (PNTL), Superintendente António de Sá, Sekretáriu Jerál CMCLN, Manuel ‘Alari’ da Costa Soares, autoridade postu no suku Bucoli no Tirilolo inklui partispante hosi komunidade.

Notísia relevante: AMRT rekolla dokumentu rezisténsia atu prezerva istória luta ba libertasaun

Jornalista  : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!