iklan

NASIONÁL, POLÍTIKA

Ekipa PNDS sei sensibiliza UKL+ iha semana oin

Ekipa PNDS sei sensibiliza UKL+ iha semana oin

Diretora Programa Nasionál Dezenvolvimentu Suku (PNDS), Claudina Soares Pinto. Imajen Tatoli/Egas Cristovão

DILI, 29 juñu 2022 (TATOLI)—Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares Pinto, hateten ekipa PNDS sei hahú halo sensibilizasaun ba programa Uma Kbiit Laek plus (UKL+) iha segunda (04 jullu) semana oin.

“UKL+ ita sei implementa iha tinan ne’e no segunda (04/07) semana oin, ita hahú halo sensibilizasaun no ami la’o tuir siklu implementasaun PNDS nian hanesan aplika ba iha UKL baibain ne’e,” Claudinha Soares Pinto informa ba Agência TATOLI, iha eskritóriu STAE Caicoli, Dili kuarta ne’e.

Tuir planu, UKL plus sei hahú konstrui iha fulan agostu nia-laran, tanba UKL plus ne’e hetan aprovasaun hosi osan retifikativu nian hamutuk millaun $25 ba benefisiáriu hamutuk 6,000.

Tanba ne’e, nia dehan, funsionáriu PNDS hotu-hotu tuir formasaun hodi hasa’e sira-nia koñesimentu no sira tenke entende didi’ak kona-ba mekanizmu manuál implementasaun UKL plus ne’e.

“Bainhira funsionáriu hotu-hotu PNDS nian entende ona mak sira sei tun ba terrenu hanorin fali ita-nia ekipa iha munisípiu sira,” Diretora ne’e hateten.

Entretantu orsamentu retifikativu ne’ebé Parlamentu Nasionál aprova no hetan ona promulgasaun hosi eis Prezidente Repúblika, Francisco Guterres “Lú Olo”, hodi finansia medida komplementár 13 ho nia alokasaun orsamentu mak hanesan;

  1. Kriasaun Fundu Veteranu ho orsamentu alokadu biliaun $1;
  2. Atribuisaun pagamentu désimu terseiru $ 200 ba kada família (eseptu funsionáriu públiku sira) ho orsamentu alokadu millaun $70;
  3. Uma Kbiit Laek Plus ho orsamentu alokadu millaun $25;
  4. Bolsa estudu ba mellor graduadu estudante ensinu báziku no sekundáriu ho orsamentu alokadu millaun $7,5;
  5. Programa Mão de Obra ba Postu Administrativu millaun $7,2;
  6. Kafé no subsídiu ba kafé Laku teen ho orsamentu alokadu millaun $6,4;
  7. Pagamentu ba diferensa remunerasaun PNTL nian ho rejime salariál foun, ba membru PNTL 4.096 ho orsamentu alokadu millaun $5,1;
  8. Harii sede artemarsiál no rituál millaun $2,5;
  9. Programa eskola iha uma ho orsamentu alokadu millaun $2,1;
  10. Internet gratuita iha eskola sira millaun $1,1;
  11. Subsídiu akomodasaun ba PNTL no F-FDTL ho orsamentu alokadu millaun $1,9;
  12. Estabelesimentu sekretária ba asuntu trabaladór exterior no komunidade Timoroan iha diaspora rihun $500;
  13. Empregu ba mellór alunu universitáriu sira rihun $437,5.

Liuhosi proposta Orsamentu Retifikativu ne’e, Governu propoin ba Parlamentu Nasionál atu halo reforsu finanseiru ba iha títulu Dotasaun Ba Governu Tomak no kria Programa foun hanaran medida orsamentu komplementár no ida-ne’e Governu halo atu labele book ka muda estrutura orsamentu pur programa.

Orsamentu Retifikativu ne’ebé Governu aprezenta ho intensaun atu redús impaktu ekonómiku ba Timoroan sira kauza hosi situasaun ekonómiku internasionál no aumentu substansiál taxa inflasaun ne’ebé sa’e ba beibeik.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!