iklan

HEADLINE, NASIONÁL, POLÍTIKA

Governu aprova remunearasaun ba Diretór Ezekutivu no Fiskál Úniku Ataúro

Governu aprova remunearasaun ba Diretór Ezekutivu no Fiskál Úniku Ataúro

Illa Ataúro. Imajen/Espesiál

DILI, 29 juñu 2022 (TATOLI)–Governu liuhosi reuniaun Konsellu Ministru, kuarta ne’e, aprova ona projetu dekretu Governu ne’ebé aprova remunerasaun ba Diretór Ezekutivu no Fiskál Úniku hosi Fundu Espesiál Dezenvolvimentu Ataúro. 

“Desizaun ne’e foti ona, espera Diretór Ezekutivu no ninia Fiskál Úniku sira bele dezempeña sira-nia funsaun ho di’ak liután,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu.

Enkuantu, valór ne’ebé propoin ba remunerasaun órgaun ezekutivu no fiskalizasaun no kontrolu Fundu Espesiál ba Dezenvolvimentu Ataúru tau iha konsiderasaun komplexidade no volume serbisu pelumenus sei ezekuta, nune’e mós valór orsamentu Fundu Espesiál Dezenvolvimentu Ataúru ne’ebé ninia ezekusaun no fiskalizasaun sei sai sira ida-idak nia responsabilidade.

Notísia relevante: Governu aprova Fundu Espesiál Dezenvolvimentu Ataúro

Iha loron 31 maiu 2021, Parlamentu Nasionál aprova Proposta-Lei Divizaun Administrativa Territóriu ho unanimidade, nune’e, Loré no Hatulia B sai postu administrativu foun no Ataúro sai munisípiu foun iha 01 janeiru 2022.

Iha tinan 2022, Governu prevee orsamentu ba Ataúro nu’udar munisípiu foun, ho montante $2.508.100, kompostu hosi saláriu no vensimentu $484.932, bens no servisu $990.797, kapitál menór $728.100, kapitál dezenvolvimentu laiha, no transferénsia públika $304.271.

Iha loron  09 marsu 2022, Governu nomea Domingos Soares hodi asume kargu Administradór munisípiu Ataúro iha rejime komisaun servisu, ba períodu tinan-tolu, sura hosi loron simu pose.

Jornalista  : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!