iklan

NASIONÁL, POLÍTIKA

Governu halo ona pagamentu pontuál ba sobrevivente na’in-lima iha Dili

Governu halo ona pagamentu pontuál ba sobrevivente na’in-lima iha Dili

Diretór Ezekutivu CNC, I.P, Hugo Maria Fernandes. Imajen TATOLI/Joanico de Araújo

DILI, 29 junu 2022 (TATOLI)—Governu liuhosi Centro Nacional Chega, Institutu Públiku (CNC, I.P) no Ministériu Solidariedade Sosiál no Inkluzaun (MSSI), iha fulan ne’e halo ona pagamentu pontuál ba sobrevivente na’in-lima (5) iha munisípiu Dili.

“Ita tinan-tinan hamutuk ho MSSI, ita halo atividadede ida bolu pagamentu pontuál. Lista ne’e sobrevivente sira ne’ebé CNC submete ba MSSI no halo ona verifikasaun, mak sira halo pagamentu. Entaun, tinan-tinan pagamentu ne’e sempre 100%, maibé agora sira hahú uluk ho 50%. Ha’u hanoin ema kuaze 60, hotu tiha ida-ne’e mak selu tán ba ema na’in-60,” Diretór Ezekutivu Centro Nacional Chega (CNC), Hugo Maria Fernandes, hateten ba Agência Tatoli, iha nia knar fatin, Balíde, Dili, kuarta ne’e.

Nia esplika, kritériu ba pagamentu pontuál ne’e mak ema ne’e tenke vítima hosi violasaun direitu umanu iha tempu pasadu.

“Sira-nia kondisaun agora ne’e iha nafatin kondisaun ida mukit liu, kbiit laiha no vulneravél liu, ida-ne’e mak sai kritériu ba pagamentu ne’e,” nia hateten.

Maske nune’e, nia akresenta prosesu ba pagamentu pontuál ba sobrevivente sira-ne’e, tinan ida simu dala ida de’it, tanba pagamentu ne’e sei halo ba sobrevivente sira hotu ne’ebé mai hosi munisípiu hotu.

“Ida ne’e, servisu MSSI nian, tanba osan ne’e tau iha MSSI, MSSI mak halo pagamentu no CNC  halo akompañamentu de’it,” nia hateten.

Diretór Divizaun Solidariedade ba Sobrevivente, Nelson Seixas Miranda, hateten Centro Nacional Chega ho nia parseiru Asosiasaun Vítima halo re-verifikasaun ba dadus sobrevivente hamutuk 170 no hetan sobrevievnte vulneravel liu ema 117, ne’ebé submete ona ba MSSI hodi hetan pagamentu pontuál.

“Ita-nia sobrevivente tama lista totál 120, na’in-tolu hasai fali tanba la prenxe rekezitu. Nune’e, ema 117 ne’e mak tama lista hodi hetan pagamentu pontuál iha tinan ida ne’e (2022), entaun  sobrevivente sira-ne’e mai hosi munisípiu 12 no RAEOA. Hosi númeru 117 ne’e, na’in-lima (5) mak hetan ona pagamentu pontuál,” nia esplika.

Nune’e, pagamentu pontuál ba sobreviente faze dahuluk hosi fulan juñu, hahú hosi munisípiu Dili, Ermera, Líquiça, Aileu, Ainaro, Covalima, Lautém no Baucau, no pagamentu pontuál ba faze daruak ba munisípiu Viqueque, Manufahi, Bobonaro no RAEOA.

Entretantu, sobrevivente na’in lima (5) ne’ebé hetan ona pagamentu pontuál mak Maria da Silva P. R. Varudo, hela fatin atuál Suku Caicoli, postu administrative Vera Cruz, Munisipiu Dili. Vitima ne’e uluk kastigu iha Atauro durante tinan tolu (3) agora nia kondisaun saúde ladi’ak.

Vítima Josefa Adão da Silva hela fatin atuál suku Dare, Postu administrative Vera Cruz, munisipiu Dili, vítima ne’e uluk militár Indonézia sama ho botas. Nia kondisaun saúde agora ladi’ak. Mariana Doutel Faria, hela fatin atuál Suku Lahane Oriental, Postu Nain-Feto, Munisipiu Dili no Vitima ne’e uluk hetan torturasaun hosi TNI ho nia kondisaun uma ladi’ak no moris hanesan feto faluk.

Maria Doutel Sarmento, hela fatin atuál suku Balibar, postu Cristo Rei, Munisipiu Dili. Vitima ne’e uluk hetan torturasaun hosi TNI. Nia agora moris hanesan feto faluk. Elvira Alves de Jesus Fernandes, hela fatin atuál suku Madohi, Postu Don Aleixo, munisipiu Dili, no vitima ne’e uluk hetan torturasaun no violasaun seksuál hosi TNI nia kondisaun saúde ladi’ak.

Hosi pagamentu ne’e, kada sobrevivente hetan osan $500.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!