iklan

HEADLINE, MUNISÍPIU, SAÚDE, VIQUEQUE

PAFG husu Autoridade Viqueque kolabora ho saúde prevene tuberkuloze

PAFG husu Autoridade Viqueque kolabora ho saúde prevene tuberkuloze

Ekipa Ministériu Saúde (MS) halo advokasia ba autoridade sira kona-ba prevensaun moras tuberkuloze no lepra iha Viqueque, kuarta (29/06). Imajen Tatoli/Vitorino Lopes da Costa

VIQUEQUE, 29 juñu 2022 (TATOLI)–Prezidente Administrasaun Fundu Global (PAFG), Noe Gaspar, husu autoridade lokál sira serbisu hamutuk ho parte saúde hodi halo prevensaun ba moras tuberkuloze no lepra iha munisípiu Viqueque.

“Ami husu autoridade sira serbisu hamutuk ho saúde hodi reforsa malu implementa programa tuberkuloze, lepra no moras sira seluk nune’e ita bele prevene moras sira-ne’e iha munisípiu Viqueque. Tanba ita-nia Primeiru-Ministru, Taur Matan Ruak, deklara ona katak Timor-Leste sei hapara moras ne’e iha tinan 2025,” Noe Gaspar, hateten ba Agência Tatoli, hafoin ramata advokasia, iha salaun munisípiu Viqueque, kuarta ne’e.

Notísia relevante: Janeiru too maiu, KBP deteta moras tuberkuloze na’in-215

Tanba ne’e, ekipa hosi Ministériu Saúde (MS) halo advokasia hodi junta forsa iha baze hodi bele implementa planu estratejia ne’ebé antes ne’e Xefe Governu deklara.

“Ami mak jere fundu globál no halo ona istimasaun ba kustu kuaze $70.000 ba programa asaun aselerasaun tuberkuloze iha munisípiu Viqueque, maibé ami mós serbisu hamutuk ho parseiru sira hanesan Klibur Domin no sira nafatin kontinua programa intervensaun ba moras ne’e,” nia akresenta.

Kona-ba prevensaun, nia husu komunidade ne’ebé sente sintoma tenke ba fasilidade saúde hodi hetan tratamentu nune’e bele salva ema-nia vida.

“Iha Timor ita-nia komunidade barak liu halai  ba matan dook hodi hemu ai-moruk tradisionál sira. Tanba ne’e, ita presiza halo advokasia no presiza halo promosaun saúde iha nível aldeia, suku hodi komunidade sira bele kompreende moras sira ne’e hodi bele asesu ba sentru saúde sira. Ita iha ai-moruk maibé ema hemu maka laiha,” nia dehan.

Tuir dadus, kazu moras tuberkuloze iha munisípiu Viqueque ne’ebé rejista iha tinan 2021 hamutuk 104, diagnóstika liuhosi bakterolojia ne’ebé konfirmadu teste hosi  kaben tasak no rejistu hosi klínika hamutuk 208, ne’ebé médiku sira identifika sintoma moras tuberkuloze hamutuk 312.

Atividade advokasia moras tuberkuloze ne’ebé realiza munisípiu Viqueque hetan partisipasaun hosi Administradór munisípiu Viqueque, xefe suku, no pesoál saúde sira iha postu administrativu Viqueque vila.

Jornalista  : Vitorino Lopes da Costa

Editora      : Julia Chatarina

iklan
iklan

Leave a Reply

iklan
error: Content is protected !!