DILI, 29 juñu 2022 (TATOLI)—Empreza lokál, Souru Coconut Oil Unipessoal Lda hosi Lautém prepara ona mina-nuu hamutuk botir 800.000 ba programa distribuisaun produtu Cesta Bázika.
“Mina-nuu ne’ebé ami prepara iha ona armazen, ne’ebé ha’u bele garante iha territóriu Timor hau bele fornese hosi 65% to’o 75% hosi produtu ne’ebé ha’u produs iha Lospalos, hosi ne’e ha’u fó serbisu ba ema 200,” Diretór empreza Souru Coconut Oil Unipessoal Lda, Arsénio da Costa Pinto Cabral, informa ba Agência Tatoli iha restaurante xinez, Hudi-laran, kuarta ne’e.
Notísia relevante: Governu lansa distribuisaun Cesta bázika faze da-ruak
Emprezáriu timor-oan ne’e dehan, liuhosi programa Cesta Bazika faze daruak ne’ebé Governu deside maioria uza produtu lokál, halo empreza lokál barak prepara produtu hodi partisipa iha programa nasionál ne’e.
Kada loron empreza prodús mina-nuu ka organic virgin coconut oil entre litru 1.000 to’o 1.500, nune’e fulan ida prodús tonelada 30 to’o 40.
“Ami prepara ona mina-nuu tonelada 500 iha armazen hodi oferese ba Cesta Bázika iha territoriu Timor,” nia informa.
Produtu lokál hanesan nuu ne’ebé empreza uza ba produsaun mina-nuu, sosa hosi povu agrikultór sira inklui komunidade lokál.
Lautém-oan ne’e sente kontente no apresia ho programa Cesta Bázika tanba bele benefisia empreza no komunidade.
Jornalista : Antónia Gusmão
Editora : Julia Chatarina
