DILI, 29 juñu 2022 (TATOLI)—Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares Pinto, informa to’o agora Uma Kbiit Laek (UKL) iha suku haat seidauk konstrui tanba iklima (udan) no la asesu dalan.
Notísia Relevante: Governu entrega Uma Kbiit Laek faze dahuluk ba benefisiáriu iha Covalima
Suku haat ne’e lokaliza iha munisípiu Covalima, Baucau, Lautém no munisípiu Manatuto ne’e iha postu administrativu Laclubar nian ne’e, seidauk konstrui tanba labele asesu dalan hodi halo mobilizasaun tula materiál konstrusaun ba suku refere.
“Entaun ida-ne’e mak sai dazafiu ida ba ita atu finaliza ita-nia konstrusaun UKL 2021 nian maibé ita nafatin esforsu hodi oinsá mak bele konklui UKL 2021 nian iha tinan ne’e, maibé bainhira udan para ne’e bele kontinua halo konstrusaun,” Diretora PNDS ne’e hateten ba Agência TATOLI, iha eskritóriu STAE, Caicoli, Dili, kuarta ne’e.
Nia iha esperansa atu konklui konstusaun Uma Kbiit Laek iha tinan ne’e, tanba Governu servisu hamutuk ho ekipa no komunidade iha aldeia no suku sira durante ne’e.
“Ita hela uma 19 maibé uma 10 seluk hahú konstrui no sia seluk mak seidauk book, maibé ita iha ona faze aprovizionamentu katak udan para ita hahú konstrui. Ami iha planu, iha fulan-agostu nia-laran tenke book ona uma hirak-ne’ebé seidauk konstrui ne’e,” nia dehan.
Nune’e, ekipa PNDS kontinua no foku ba Uma Kbiit Laek 2022, inklui UKL+ no programa PNDS seluk ne’ebé liga ho infraestrutura nian iha territóriu Timor-Leste.
“Maibé UKL 2021 nian ne’e, ita atinje ona liu 90% no fiar katak iha agostu ita bele konstrui no finaliza restu ne’ebé seidauk halo, tan de’it udan no dalan ladi’ak,” nia hateten.
Uma Kbit Laek ne’ebé seidauk konstrui ne’e sei uza ho métodu implementasaun foun ba uma 19 ne’ebé atu konstrui iha área rurál, ne’ebé fatin ne’e labele asesu dalan no susar karreta transporta materiál konstrusaun atu konstrui Uma Kbiit Laek refere.
“Ami re-dezenu konstrusaun UKL ne’ebé seidauk konstrui ne’e nia dezeñu sei la hanesan ho ida uluk tanba PNDS hakarak halo uma simples, nune’e nia orsamentu tenke aloka barak ba mobilizasaun materiál ba benefisiáriu nia fatin,” nia dehan.
Maibé, diretora ne’e hateten, iha benefisiáriu balun ne’ebé la konkorda ho modelu ka dezenu foun ne’e tanba uma ho dezeñu foun ne’e simples maibé dapur laiha no ida uluk di’ak maibé ho kustu boot.
“Ita hakarak hili dezeñu foun para poupa osan hodi aluga kuda ka selu ema lalin materiál ba suku ka aldeia refere hodi konstrui,” nia dehan.
Nia informa, konstrusaun Uma Kbiit Laek (UKL) 2021 nian ne’ebé ninia konstrusaun finaliza ona ne’e iha munisípiu Aileu, Liquiça no munisípiu Manufahi.
Konstrusaun Uma Kbiit Laek (UKL) iha faze dahuluk nian ne’e, Governu prevee orsamentu rihun $25 ba uma 1.254 ne’ebé konstruu iha territóriu nasionál.
Jornalista : Osória Marques
Editór : Cancio Ximenes
