iklan

NASIONÁL, POLÍTIKA

UKL 2022 iha faze mobiliza materiál konstrusaun ba benefisiáriu sira

UKL 2022 iha faze mobiliza materiál konstrusaun ba benefisiáriu sira

Uma Kbiit Laek iha suku Holsa, postu administrativu Maliana, munisípiu Bobonaro. Imajen Tatoli/Sérgio da Cruz.

DILI, 29 juñu 2022 (TATOLI)—Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares Pinto, hateten konstrusaun Uma Kbiit Laek (UKL) 2022 agora daudaun iha faze mobiliza materiál konstrusaun ba benefisiáriu sira iha territóriu Timor-Leste.

Notísia Relevante: Governu sei identifika uma-kain 6.000 sai benefisiáriu UKL+

“Uma Kbiit Laek tinan ne’e, maiória foin mak prosesu mobiliza materiál kontrusaun maibé komu udan entaun ami seidauk bele hahú konstrusaun tanba territóriu nasionál udan hotu,” Diretora PNDS ne’e hateten ba Agência TATOLI iha eskritóriu STAE, Caicoli, Dili, kuarta ne’e.

Ekipa PNDS, nia dehan, daudaun ne’e hein hela bainhira udan para mak ekipa halo konstrusaun ba UKL ne’e, tanba antes ne’e ekipa identifika hotu ona benefisiáriu ba UKL 2022 nian.

“Bainhira udan para ita hahú konstrui UKL hamutuk 4,000 no kada suku iha 10. Parese, ita atu konstrui loloos ne’e iha fulan agostu nia-laran tanba tama ba fulan-agostu ne’e udan hahú para ona,” nia dehan.

Nia hatutan, orsamentu ba konstrusaun Uma Kbiit Laek (UKL) 2022 nian transfere hotu ona konta bankária suku nian liuhosi fundu transferénsia públika nian.

Ba tinan 2022 ne’e, VIII Governu Konstitusionál aloka tan osan hamutuk millaun $71 hodi halo konstrusaun Uma Kbiit Laek (UKL) hamutuk 4,000 ba faze daruak nian no kada suku sei hetan uma 10 no ezetu munisípiu Dili.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!