iklan

DILI

World Bank: presiza dezenvolve kapitál umanu investe iha jerasaun tuirmai

World Bank:  presiza dezenvolve kapitál umanu investe iha jerasaun tuirmai

Vise Ministru Finansa, António Freitas hamutuk ho Reitór UNTL, João Soares Martins no diretor banku mundial iha Timor-Leste, Satu Kahkonen, lansa relatóriu Ekonomia Timor-Leste nian fila-fali ba kresimentu sustentavel ba future”, iha salaun Hotel Timor, kuarta (29/06). Imajen Tatoli /Egas Cristóvão.

DILI, 29 juñu 2022 (TATOLI)—Representante World Bank Group, Bernard Harborne, hateten ekonómia Timor-Leste agora prosesaun rekuperasaun 3%, nune’e presiza dezenvolve ba kapitál umanu liu-liu investe iha jerasaun tuirmai.

“Ita hatene katak ekonómia agora prosesaun ba rekuperasaun ekonómika iha 3%, maibé ita hatane katak ne’e la naton maibé sa’e uituan de’it. Maibé la’ós atu rekupera tomak no sei hasoru problema, tanba ne’e mak ami-nia relatóriu ohin loron nian fó espesiál atu dezenvolve ba kapitál umanu liu-liu investe iha jerasaun tuir mai, atu nune’e ida-ne’e sai foku ba ita hodi kuidadu no lori ba oin ho di’ak liután,” Bernard Harborne hateten, iha Otél Timor, Dili kuarta ne’e.

Ida-ne’e atu la’o di’ak, Governu mak tenke halo buat rua mak ida tenke rai osan didi’ak no investe ilha setór produtivu hanesan agrikultura no trlurizmu hodi hasa’e rendimentu no akumula reseita barak liután. Ikus mak tetu, atu oinsá mak uza osan ne’e di’ak hodi esegura dezenvolviementu sustentável Ekonómia.

Nia hateten, krize sei kontinua tanba COVID-19, siklone tropikál seroja no mós inflasaun ne’ebé sa’e makaas.

“Inflasaun sei sa’e ba oin maibé ita hanoin katak Governu sei servisu makaas no agora daudaun ita haree Governu fó ona subsídiu hanesan eletrisidade no kombustivel maibé ita lahatene ida-ne’e to’o bainhira,” nia dehan.

Representante World Bank ne’e informa, tinan fiskál ida-ne’e, World Bank investe tokon $120 ba iha projetu Bee Timor-Leste (BTL).

Diretora Banku Mundiál Indonézia no Timor-Leste, Satu Kahkonen, haktuir iha 2022  Timor-Leste nia ekonómia naun-petrolíferu projeta atu aumenta 3.0,  sustenta ho aumentu signifikativu iha despeza no investimentu Governu nian  no mós rekuperasaun konsumu privadu nian ne’ebé hetan apoiu hosi inisiu graduál loke fronteira sira-nian.

Nia dehan, aumentu presu hahán, kombustivel no eletrisidade ne’ebé afeta hosi funu iha Ukránia bele lori tempu naruk no bele fó impaktu ba prospeiru kresimentu iha futuru, tuir edisaun juñu 2022 Banku Mundial nia Relatóriu Ekonómiku Timor-Leste ne’ebé husi COVID-19 no Siklone Tropikál Seroja.

“Entaun iha 2021, ekonómia naun-petroliféru sa’e ho 1.5%,” nia dehan.

Maske projeta katak kresimentu sei kontinua iha taxa ne’ebé hanesan iha tinan 2023, inflasaun ne’e sei iha impaktu ba rekuperasaun iha tempu naruk no reforma estrutura nian sira sei sai fundamentál tebes, atu estabelese baze ba kresimentu ne’ebé diversifikadu no reziliente liután iha futuru.

“Tuir relatóriu ne’e, presiza estratéjia ida atu hatán ba dezafiu sira ba prazu badak no prazu médiu. Politika fiskál tenke iha objetivu atu proteje ema vulneravél sira hosi folin ai-han no komvustível ne’ebé sa’e, liu-liu liuhusi asisténsia espesífiku,” Satu Kahkanen esplika.

Govemu bele promove asaun polítika hodi hamenus presu ai-han liuhosi aumenta produtividade agrikulturál no hasa’e nutrisaun liuhosi diversifikasaun produsaun doméstiku. Diversifikasaun ekonómia liuhosi dezenvolvimentu setór exportasaun importante ba kresimentu sustentável.

Iha parte enerjia nian, efisiénsia hosi jerasaun eletrisidade nian no provizaun sira tenke hadi’a, nune’e bele fó impaktu pozitivu ba orsamentu no hamenus ain-fatin karbonu nasaun nian. Diversifikasaun fonte enerjia inklui enerjia renovável tenke esplora liután.

Aumenta investimentu kapitál umanu tipikamente benefisia ema ki’ak sira liuhosi hadi’ak defisiénsia no lakuna sira servisu nian no hamenus dezigualdade sira.

Reitor Universidade Nasionál Timor Lorosa’e (UNTL), João Martins, hateten relatóriu ne’ebé World Bank lansa ohin ne’e importante tebes tanba sira-nia relatóriu ne’e ho topiku investe iha jerasaun tuir mai.

“Tanba ida-ne’e sai hanesan kauza Nasionál ida, nune’e ita-nia Governu tenke investe ba joven iha futuru nasaun ne’e nian, investe iha edukasaun, saúde, atu nune’e ita bele hetan rekursu kapitál umanu ne’ebé di’ak iha futuru,” nia dehan.

Maibé Governu presiza hadi’a mak númeru estudante maibé agora estudante barak mak eskola no barak iha universidade hodi kompara ho uluk ne’e ladún barak.

“Progressu boot ida ne’ebé nasaun atinje maibé ita tenke foka liután informasaun balun kona-ba vokasionál,” nia dehan.

Jornalista  : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!