BOBONARO, 29 juñu 2022 (TATOLI) – Xefe suku Holsa, postu administrativu Maliana, munisípiu Bobonaro, António Santa Cruz, simu ona motorizada hosi Ministériu Administrasaun Estatál (MAE).
Nia haktuir, momentu governu distribui motorizada hamutuk 451 ba lideransa komunitária iha territóriu nasionál ho tipu versa, maibé só úniku nia mak governu entrega marka revo roda tolu ho númeru matríkula 9814 GA ne’ebé para hela iha edifísiu administrasaun munisípiu Bobonaro.
Maibé iha loron 09 fulan-juñu ne’e foin simu motorizada tipu versa ho númeru matríkula 5354 GA.
Notísia relevante: Xefe suku Holsa seidauk simu motór hosi Governu
Governu distribui motorizada roda tolu tanba konsidera António Santa Cruz kondisaun fízika defisiente, maibé iha altura ne’ebá nia rasik rezeita tanba motorizada refere la kodiz ho área jeografika suku Holsa nian.
Nia haktuir, dezde 2019 mai to’o fulan-juñu 2022 halo serbisu atende komunidade iha baze no partisipa iha enkontru sira organiza hosi parseiru sira no kontribui apoia programa governu utiliza de’it transporte espesiál (ojek).
“Iha munisípiu Bobonaro simu motorizada ikus mak ha’u, ha’u sente governu la konsidera ami tanba ne’e mak mandatu atu remata mak foin entrega motorizada ne’e mai, haree netik orsamentu restu balu iha mak foin fó mai,” nia informa ba Jornalista Tatoli, iha kna’ar fatin, Holsa, kuarta ne’e.
Xefe suku Holsa agradese Ministériu Administrasaun Estatál tanba bele reponde ona preokupasaun maske tarde maibé molok termina mandatu bele fasilita nia halo serbisu ba nia komunidade.
Nune’e nia rekomenda ba governu katak, planu halo eleisaun ba lideransa komunitária importante liu mak tenke tau importánsia no kria kedas kondisaun inklui ekipamentu ba xefe suku sira atubele halo serbisu hodi atende povu iha baze.
António Santa Cruz lidera suku Holsa, períodu dala-tolu ona, hahú hosi 2004, 2009, 2016 no ukun komunidade aldeia neen mak hanesan Solugolo, Bilicou, Secar, Taz, Lolo’a no Oplegul ho totál ema hamutuk 7,967 komposta hosi mane 3,929 no feto 4,038 ho totál xefe família 1.802.
Notísia relevante:Família 150 iha suku Holsa seidauk simu Cesta Bázika
Jornalista : Sérgio da Cruz
Editór : Evaristo Soares Martins
