iklan

HEADLINE, JUSTISA

Ajénsia New Generation prontu reembolsa osan billete ba Sofia Amaral

Ajénsia New Generation prontu reembolsa osan billete ba Sofia Amaral

Responsável Ajénsia New Generation, Francisco Fernandes Ximenes. Imajen Tatoli/Jogerjo Guterres.

DILI, 30 juñu 2022 (TATOLI)— Responzavél Másimu Ajénsia New Generation, Francisco Ferdandes Ximenes, hateten prontu rembolsa osan ne’ebé Sofia Amaral gasta ba sosa billete tanba la konsege hala’o viajen ba Portugál.

“Ami prontu koopera ho vitima Sonia Amaral Pinto hodi fó fila nia osan sorin. Maibé nia tenke mai iha ami nia fatin atu ko’alia buat ruma, liuliu asina tiha deklasaun ruma maka ami foin fó-fila nia osan,” Responzavél ajénsia hateten ba Agência TATOLI, via telefônika, kinta ne’e.

Notísia relevante: New Generation justifika la ko’a joven nia isin antes ba Portugál

Daudaun ne’e, Ajénsia New Generation halo ona kontaktu ho família vítima Sofia atu hasoru-malu hodi resolve kestaun ida ne’e.

“Ohin, ha’u kontaktu ona nia-ama ho nia (Sofia) hodi ami bele hasoru malu hodi rezolve tiha problema ne’e. Maibé parte vitima nia ama informa mai katak, vitima sei halo viajen bá Uatulari-Viqueque tanba família mate, ne’ebé ami hein fila mai bele resolve asuntu ne’e,” nia akresenta.

Kona-ba kestaun fera isin, nia rejeita tanba ajénsia ne’e fasilita ema-nia viajen ba diáspora, hodi serbisu hadi’a nia morisa,  la’ós fera ema nia isin.

Iha fatin ketak, Pesoál Ajénsia New Geration, Armindo Amaral (Ameu Black), hateten nia parte prontu fasilita atu vitima hetan fila-fali nia-osan ne’ebé,  sosa  ba tikete tanba la konsege ba Portugál, maibé fila de’it iha Bali.

“Ha’u ko’alia ona ho vitima nia ama katak, ha’u hanesan ema ne’ebé maka responsavél ba vitima, prontu fasilita vitima hodi hetan fila-fali nia osan sorin hosi Ajénsia New Generation. Maibé parte vitima tenke klarifika lai razaun tanba sa maka nia fila hosi Bali mai Timor-Leste,” nia akresenta.

Responsavél ne’e mós rejeita informasaun kona-ba obriga Sofia hodi fera nia isin antes arranka bá Bali-Indonézia.

Nia esplika, antes vitima atu arranka ba iha Bali, iha loron 12 juñu, vítima ne’ebé akompaña ho nia inan no família balun mai toba iha uma duni.

“Ha’u atu dehan katak ha’u la obriga vitima hodi fera nia isin hodi tau pontu, maibé ha’u husu vítima ho nia-ama mak hakarak ka aseita mak ha’u fera nia isin. Se dehan ha’u obriga ne’e la’e”, nia afirma.

Entretantu, Reprezente família vitima Sofia Amarál, Jonas Chege, husu ba   Ajénsia New Generation atu reembolsa vitima nia osan ho voluntáriu tanba prosesu viajen ne’e la tuir konkordansia ne’ebé antes halo iha Timor.

“Ami família vitima husu Ajénsia tenke reembolsa vitima nia osan ho voluntáriu tanba prosesu viajen ne’e la tuir konkordansia ne’ebé antes halo iha Timór,” Família Sofia ejize.

Notísia relevante:  Prezidente Os Verdes klarifika la haruka timoroan servisu iha rai-li’ur

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!