DILI, 30 juñu 2022 (TATOLI)–Governu liuhosi Ministériu Finansa (MF), kinta ne’e, realiza jornada orsamentál ho tema ‘Mai ita konkretiza medida iha Lei Grande Opsaun Planu 2023, hodi rekupera ita-nia ekonomia no atinje dezenvolvimentu ida ne’ebé sustentável, inkluzivu no reziliente’.
Ministru Finansa, Rui Augusto Gomes, konsidera tema ne’e importante tamba kontempla objetivu prinsipál tolu atu hetan informasaun kona-ba medida 275 ne’ebé kontempla iha Lei Grande Opsaun Planu (GOP) 2023.
Alende ne’e, atu hetan informasaun kona-ba tetu finál globál ba Orsamentu Jerál Estadu (OJE) 2023 ne’ebé aprova ona iha Lei GOP 2023 nia laran no ikus liu atu diskute kritériu sira ne’ebé sei uza hodi define tetu desagregadu ba OJE 2023.
“Rezultadu ne’ebé ita hotu espera hosi jornada orsamentál ne’e mak apresiasaun ba kritériu sira kona-ba tetu desagregasaun, intende didi’ak prioritizasaun medida sira iha Lei GOP, hetan konfirmasaun kona-ba lista organizasaun sira ne’ebé halo ita-nia OJE no ikus mak prioridade investimentu ba fundu infraestrutura ba projetu sira la’o hela no projetu ne’ebé sei hetan finansiamentu hafoin prienxe kritériu hosi saida mak Ministériu Planu Ordenamentu estabelese ona,” Ministru Rui hateten iha ámbitu jornada orsamentál ne’ebé hala’o iha salaun MF, Aitarak-laran.
Notísia relevante: Governu deside senáriu fiskál biliaun $1,797 ba OJE 2023
Semana rua liubá, Prezidente Repúblika, José Ramos Horta, promulga ona Lei GOP 2023, hafoin hetan aprovasaun iha Parlamentu Nasionál no promulgasaun ne’e akontese iha momentu oportunu, bainhira Governu hahú hakat ona hosi faze planeamentu (faze primeiru) ba faze orsamentasaun (faze segundu) hosi elaborasaun OJE 2023.
Aleinde ne’e, iha fevereiru liubá, Prezidente Repúblika, Francisco Guterres ‘Lú Olo’ promulga ona Lei Enkuadramentu Orsamentál, ne’ebé hanesan lei estruturante ne’ebé sai baze atu reforma jestaun finanseira públika.
“Lei estruturante ne’e halo revolusaun boot ba prosesu orsamentál no jestaun finanseira publika, hodi tuir prátika di’ak internasionál no adapta ba sirkuntánsia espesífiku. Promulgasaun lei ne’e nu’udar konkista importante ne’ebé mak VIII Governu Konstitusionál hetan iha tinan ida-ne’e,” Ministru FInansa subliña.
Enkuantu, lei foun ne’ebé estabelese ba faze rua ba prosesu orsamentál, faze dahuluk akontese iha semestre dahuluk ne’ebé uza ba halo planeamentu, ho aprovasaun planu anuál ba kada entidade Estadu no tuir kedan ho aprovasaun Lei GOP ne’ebé define medida prinsipál sira ne’ebé mak Governu sei implementa iha tinan oin mai.
Faze daruak akontese iha semestre daruak ne’ebé uza ba orsamentasaun no sei konklui ho aprezentasaun Proposta Lei OJE iha loron 01 outubru ba Parlamentu Nasionál.
“Ita-nia prezensa ohin loron iha ne’e hanesan parte ida hosi prosesu orsamentasaun ne’e rasik,” governante ne’e dehan.
Jornada orsamentál sei realiza durante loron-ida, ne’ebé loke hosi Vise Primeiru-Ministru no Ministra Solidariedade Sosiál no Inkluzaun, Armanda Berta dos santos, no partisipa hosi membru Governu no entidade Estadu hotu.
Antes ne’e, iha loron 26 abril 2022, bainhira Governu realiza sesaun diskusaun no apresiasaun ba medida prinsipál ba OJE 2023, Governu deside senáriu fiskál ho montante biliaun $1,797.6.
Jornalista : Antónia Gusmão
Editora : Julia Chatarina
