HEADLINE, SAÚDE

HNGV kontinua enfrenta problema rekursu umanu no ekipamentu médiku

HNGV kontinua enfrenta problema rekursu umanu no ekipamentu médiku

Hospital Nasionál Guidu Valadares (HNGV). Imajen Tatoli/Francisco Sony

DILI, 29 juñu 2022 (TATOLI)—  Hahú hosi 2003 to’o oras ne’e Hospitál Nasionál Guido Valadares (HNGV), kontinua enfrenta problema menus rekursu umanu no ekipamentu médiku hodi atende pasiente sira.

“Ita nia ekipamentu médiku no rekursu umanus seidauk sufisiente, maibé ita presiza nafatin tau atensaun hodi fó atendimentu saúde ne’ebé di’ak ba populasaun sira,” Diretór Klíniku Hospitál Nasionál Guido Valadares (HNGV), Marcelino Correia, hateten ba Agência TATOLI iha nia kna’ar fatin Bidau, kuarta ne’e.

HNGV hanesan instituisaun autónomu ne’ebé iha planu rasik atu  hadi’a rekursu umanu no ekipamentu médiku, nune’e kontinua haruka médiku bá eskola iha rai li’ur  hodi hasai espesialidade hodibele fó atendiemntu ne’ebé di’ak ba populasaun sira.

Nune’e, iha aniversáriu ba dala-19 ne’e, nia dehan iha etapa ida ne’ebé presiza hadi’a entermus rekursu umanu hodi fó atendimentu ba pasiente sira ho profisionál.

“Ha’u husu ba pasiente sira atu nafatin tau fiar ba médiku sira, atu nune’e fó atendimentu di’ak ba ita boot sira. Tanba ospitál ne’e ema hotu nian ho responsabilidade atubele hamutuk no tau matan no halo ospitál sai di’ak liután hodi fó asisténsia saúde ne’ebé kualidade ba pasiente sira,” nia sujere.

HNGV mós hasoru dezafiu lubuk ida liuliu kondisaun infraestrutura ne’ebé defikulta bainhira pasiente barak tanba balun toba de’it iha areadór hodi hetan tratamentu saúde.

Totál rekursu umanu ne’ebé mak servisu iha HNGV hamutuk 2.000-resin, kompostu hosi Parteira Médiku, Enfermeiru no tékniku aliadu inklui seguransa.

Enkuantu, médiku espesialista sira ne’ebé sai parseiru hodi ajuda  mak médiku hosi nasaun Xina hamutuk 10, médiku Kubanu na’in-20 no Austrália na’in-50.

Entretantu, Minisitra Saúde, Odete Maria Freitas Belo, informa ho ezisténsia HNGV ba dala-XIX ne’e, motiva profisionál saúde hotu atu kontinua serbisu ho profisionál hodi fó atendimentu liuhosi kuidadu tersiariu ba ema hotu ne’ebé presiza fó asisnténsia saúde.

“Durante ne’e, ema barak krítiku dehan ai-moruk laiha, ekipamentu laiha no rekursu umanus laiha,maibé ita konsege redús moras sira hanesan COVID-19 no moras sira seluk  ne’ebé mak mai halo tratamentu  iha Hospitál ne’e,” Ministra saúde ne’e afirma.

Tanba ne’e, Governante ne’e husu ba médiku sira katak, maski rekursu umanu no ekipamentu ne’ebé limitadu, maibé ho esforsu ne’ebé mak iha nafatin kuidadu  pasiente sira.

“Ita sei kontinua investe liuliu ekipamentu no rekursu umanu iha setór saúde tanba ita nia meta hakarak sidadaun hotu moris ho saudavél,” nia kompromete.

Notísia relevante:  Janeiru too abríl, HNGV fó tratamentu médiku ba veteranu 2.137

Jornalista : Felicidade Ximenes

Editór       : Florencio Miranda Ximenes

iklan
iklan

Leave a Reply

iklan
error: Content is protected !!