iklan

DILI, POLÍTIKA

Komisaun B-Governu hahú diskute atu ratifika konvensaun direitu ba EhD

Komisaun B-Governu hahú diskute atu ratifika konvensaun direitu ba EhD

Ema ho Defisiénsia partisipa serimónia komemorasaun loron Restaurasaun Independénsia Timor-Leste ba dala XX, iha Palásiu Prezidensiál Nicolau Lobato, Bairru Pite, sesta (20 maiu 2022). Imajen Tatoli/Francisco Sony.

DILI, 30 juñu 2022 (TATOLI)—Komisaun B iha Parlamentu Nasionál (PN) ne’ebé trata asuntu Negósiu Estranjeiru no Defeza ho Seguransa, konvida entidade relevante hodi halo audiénsia públika atu rona Governu nia hanoin no PN bele ratifika konvensaun internasionál direitu ba Ema ho Defisiénsia (EhD).

Notísia Relevante: RHTO husu PR propoin ba PN ratifika konvensaun direitu ba EhD

Audiénsia públika ne’e hala’o ona iha kuarta (29/06) ne’ebé partisipa hosi Ministéiru Negósiu Estranjeiru no Kooperasaun (MNEK), Ministéiru Solidariedade Sosiál no Inkluzaun (MSSI).

“Ita hala’o tiha ona audiénsia no ohin ami atu aprova de’it relatóriu paresér hodi submete ba meza Parlamentu Nasionál no iha segunda (04 jullu) bele aprova iha plenária,” Prezidente Komisaun B, José Agostinho Sequeira ‘Somotxo’, hateten ba jornalista sira iha Parlamentu Nasionál, kinta ne’e.

Tuir rejimentu Parlamentu Nasionál bainhira meza PN baixa ka submisaun proposta atu ratifika konvensaun ne’e mak komisaun sei halo analiza no fó paresér, nune’e komisaun hala’o audiénsia públiku ho entidade relevante hodi fó sira-nia hanoin hafoin halo relatóriu no paresér submete ba meza PN mak iha kompeténsia ajenda diskusaun iha plenária hodi aprova ka ratifika.

Tuir Konstituisaun Repúblika Demokrátika Timor-Leste (KRDTL) artigu 95 (Kompeténsia Parlamentu Nasionál nian) iha alínea 3 parte “f” ne’e hateten aprova no mós fó sai akordu no ratifika tratadu no konvensaun internasionál sira.

Nune’e, bainhira PN ratifika ona konvensaun ne’e mak sei proteje liután ema ho defisiénsia sira iha aspeitu oioin iha prosesu dezenvolvimentu.

“Konvensaun ne’e ratifika importante ne’e responsabilidade boot kona-ba infraestrutura, kondisaun hotu-hotu hanesan dignifika ita-nia maluk ema ho defisiénsia sira ho direitu umanu ne’ebé responsabilidade boot hosi Ministéiru Solidariedade Sosiál no Inkluzaun (MSSI) ho entidade relevante sira,” nia hateten.

Entertantu, iha tinan barak nia laran liu-lius organizasaun sosiedade sivíl ne’ebé hamatan ba Ema ho Defisiénsia (EhD) sira ezije Estadu Timor-Leste atu ratifika ona konvensaun refere, nune’e bele proteje sira-nia direitu hanesan ema ho defisiénsia ida.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!