iklan

DILI, POLÍTIKA

Komisaun B ho entidade relevante diskute empeñamentu operasionál kombate tráfiku umanu

Komisaun B ho entidade relevante diskute empeñamentu operasionál kombate tráfiku umanu

Prezidente Komisaun B (Negósiu Estranjeiru, Defeza no Seguransa), José Agostinho Sequeira ‘Somotxo’, Imajen/Dok.Tatoli

DILI, 30 juñu 2022 (TATOLI)—Komisaun Komisaun B iha Parlamentu Nasionál (PN) ne’ebé trata asuntu Negósiu Estranjeiru no Defeza ho Seguransa, kinta ne’e, konvida entidade relevante halo audiénsia hodi diskute empeñamentu operasionál atuasaun kombate kazu tráfiku umanu iha Timor-Leste.

Notísia Relevante: TDD aplika TIR ba sidadaun estranjeiru nain-rua ne’ebé envolve kazu tráfiku umanu

Entidade relevante ne’ebé partisipa iha diskusaun ne’e mak Ministéiru Interiór (MI), Polísia Nasionál Timor-Leste (PNTL) no Polísia Sientífiku Investigasaun Kriminál (PCIC, siglá portugés).

Prezidente Komisaun B, José Agostinho Sequeira ‘Somotxo’, hateten objetivu hosi audiénsia ne’e tanba ho preokupasaun komisaun nian ligadu ba situasaun tráfiku umanu ne’ebé daudaun ne’e sai preokupasaun boot iha Timor-Leste.

“Tanba ne’e, urjente bolu entidade sira hodi fanun sira oinsá kombate tráfiku umanu pessoa iha Timor-Leste tenke buka medida, se lae iha futuru kontinua akontese,” Somotxo hateten ba jornalista sira iha Parlamentu Nasionál.

Tráfiku umanu pessoa signifika krime organizadu tanba timoroan rasik liuhosi ajénsia ho estranjeiru mak envolve, tanba ho situasaun ne’ebé hasoru iha rai-laran nune’e mosu tráfiku pessoa.

Bibán ne’e, membru Parlamentu Nasionál ne’e apela ba timoroan sira molok atu ba servisu iha rai-li’ur tenke verifika didi’ak ho instituisaun relevante molok dezloka ba rai-li’ur, nune’e ikus labele hasoru problema oioin.

Diretór Jerál Polísia Siéntifika Investigasaun Kriminál (PCIC, sigla portugés), Vicente Fernandes Brito, hateten komisaun B konvida nia-parte atu fó hanoin ruma no analiza kona-ba situasaun reál ne’ebé akontese iha rai-laran ligadu ba tráfiku umanu.

“Ita la ko’alia kona-ba kazu konkretu tanba ne’e segredu justisa. Apenas fó ideia de’it oinsá iha futuru Parlamentu Nasionál ho instituisaun relevante bele halo prevensaun no aumezmu tempu halo represivu ba kombate tráfiku umanu,” nia dehan.

PCIC hanesan órgaun superiór polísia kriminál, ninia servisu mak halo prevensaun no represivu ba krime sira boot inklui tráfiku umanu ne’ebé sai hanesan preokupasaun públiku.

Dezde ezisténsia PCIC hahú iha tinan 2015 to’o ohin loron, PCIC rejista ona kazu tráfiku umanu maibé kazu la’ós dominante.

“Ita dadus konkretu maibé ha’u haluha tiha ona, maibé iha kazu konkretu rejista la barak, entre iha ida ka rua de’it. Kuandu kazu tráfiku umanu tipu mak hanesan de’it ninia objetivu explorasaun seksuál, traballu forsadu ho sira seluk tan,” nia relata.

Hatán kona-ba desizaun primeiru interrogatóriu Tribunál Distritál Dili (TDD) aplika Termu Indentidade Rezidénsia (TIR) ba arguidu sira ba kazu tráfiku umanu sidadaun timoroan feto na’in hitu (7) iha Dubai ne’ebé bele konsidera prova ne’ebé PCIC rekolla ladún forte, Vicente Brito hatán, nia parte labele fó komentáriu ba asuntu ida-ne’e.

“Ha’u labele fó komentáriu kona-ba prosesu ne’e, ne’e ita-nia prosesu kuantu mais aplika medida koasaun. Prosesu ita labele ko’alia tanba lei ne’ebé vigór proibi autoridade ida divulga prosesu iha públiku liuhosi mídia komunikasaun sosiál, tanba ema sei goza direitu silénsiu no prezunsaun inosensia no labele estraga prosesu investigasaun,” nia dehan.

Tuir nia, atu kombate tráfiku umanu pilár ida importante mak kooperasaun no koordenasaun instituisaun nasionál ba krime natureza abranje to’o estranjeiru transnasionál no mós kooperasaun no koordenasaun internasionál.

“Ita iha enkuadramentu legál ne’ebé sufisiente inklui ratifika konvensaun lubuk ida, maibé enkuadramentu legál de’it la sufisiente tanba ita kombate ne’e ema,” nia hateten.

Notísia Relevante:  Komisaun A seidauk simu projetu-lei Antí Tráfiku Umanu

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!