iklan

COVALIMA, INTERNASIONÁL, POLÍTIKA

Mercy Corps-Autoridade Covalima diskute identifika aldeia risku dezastre naturál

Mercy Corps-Autoridade Covalima diskute identifika aldeia risku dezastre naturál

COVALIMA, 30 juñu 2022 (TATOLI)—Organizasaun Internasional (OI) Mercy Corps hamutuk ho autoridade lokál halo diskusaun hamutuk hodi identifika aldeia ne’ebé risku ba dezastre naturál iha munisípiu Covalima.

“Atu identifika aldeia sira-ne’ebé risku dezastre naturál, ami sei halo diskusaun nune’e ami konvida administradór no xefe suku sira, ita bele identifika hodi hato’o rekomendasaun. Tanba, sira mak hatene área ne’ebé risku ba dazestre naturál,” Jerente Mercy Corps, Valentino Gusmão, hateten ba jornalista sira, iha salaun administrasaun Covalima, Kampung Baru, kinta ne’e.

Hafoin halo diskusaun ho administradór postu administratrivu ho xefe suku sira konsege identifika hamutuk aldeia risku dezastre naturál, ekipa hosi programa tun ba terrenu hodi halo verifikasaun ba aldeia sira afeitadu duni ba dazetra naturál

“Ami-nia ekipa servisu programa ni’an sei tun hodi halo verifikasaun aldeia ne’e afeta dezastre ka lae, nia prenxe kritériu programa ka lae. Hafoin deside aldeia ne’e, ita presiza halo intervensaun hodi introdús programa hanesan mitigasaun, preparasaun, adaptasaun no responde bainhira akontese dezastre naturál,” nia informa.

Tanba ne’e, hafoin identifika aldeia sira tenke prenxe kritériu sira hanesan komunidade hela iha risku dezastre, iha  istória komunidade hetan ona dezastre ka lae, asesu ba informasaun kona-ba dazastre iha ka lae. Se la asesu ida-ne’e mak halo sira la iha preparasaun di’ak komunidade sira sai vítima no prepara mekanizmu atu responde dezastre naturál.

Reprezentante administradór Munisípiu Covalima, Francisco Mendonça reforsa, programa hosi Mercy Corps importante ba autoridade lokál no xefe suku sira bele fahe tutan informasaun ba komuniade ne’ebé hela iha fatin risku.

“Ita-nia munisípiu sempre akontese dezastre naturál, entaun presiza halo reuniaun hanesan ne’e hodi fahe informasaun ba xefe suku no xefe aldeia sira, oinsá mak bele fahe tutan informasaun no fo atensaun ba komunidade iha fatin risku,” nia dehan.

Fatin sira-ne’ebé risku ba dezastre natural mak hanesan komunidade sira konstrui iha mota ninin, komunidade halo toos iha foho leten ida-ne’e kontribui risku ba dezastre rai halai, tanba ema mak sai autór ba risku dezastre naturál.

Aleinde halo diskusaun hodi identifika aldeia risku dezastre naturál, Mercy Corps lansa programa maneja risku liuhosi dezenvolvimentu ekonamia (MRED) faze  haat (4), ho durasaun programa tinan tolu (3) ne’ebé lansa hosi reprezentante administradór Covalima, Francisco Mendonça “Tatamero” hamutuk ho autoridade lokál sira.

Iha faze haat ne’e ho programa no atividade foku ba maneja risku dezastre hanesan mós ho faze tolu, maibé iha mudansa balun iha área alvu hanesan iha suku no aldeia aumenta foun inklui maneira implementasaun atividade

Programa iha ne’e atu haree liu oinsá mak atu redus impaktu hosi risku dezastre naturál iha komunidade liu-liu ba família vulneravél sira risku dezastre naturál iha Covalima halo operasaun iha aldeia 10 ne’ebé sai trajetu ba programa iha suku lima, maibé sei aumenta tan aldeia lima hodi kompleta aldeia 15.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!