iklan

HEADLINE, MUNISÍPIU, VIQUEQUE

MOP Viqueque koordena parte nasionál hodi normaliza ponte Uani-uma

MOP Viqueque koordena parte nasionál hodi normaliza ponte Uani-uma

Ponte Uani-uma iha postu Uatucarbau kotu difikulta movimentu públiku, kinta (30/06). Imajen Tatoli/Vitorino Lopes da Costa

VIQUEQUE, 30  juñu 2022 (TATOLI)—Ministériu Obra Públika (MOP), kinta ne’e, manda ona pedidu ba nasionál hodi rezolve ponte Uani-uma, postu Uatucarbau, munsípiu Viqueque ne’ebé kotu, kauza hosi udan-boot to’o mota sa’e desde kuarta (29/06) to’o ohin dadeer.

“Ohin ha’u haruka ona pedidu ba nasionál ne’ebé iha tempu badak sei normaliza filafali ponte Uani-uma ne’ebé hodi kalan kotu. Ita fó hatene ona sira hosi nasionál parte Diresaun Nasionál Kontrolu Estrada no Ponte mak sei haree,” Diretór Servisu MOP munisípiu Viqueque, Mário do Rego, informa ba Agência Tatoli, iha postu Viqueque vila, kinta ne’e.

Notísia relevante: Ponte Uani-uma Viqueque kotu difikulta movimentu transporte no ema

Nia dehan, parte MOP sei esforsu halo kordenasaun ho nasionál hodi bele rezolve atu komunidade sira bele utiliza fali.

“Agora daudaun mós ha’u iha hela terrenu, tanba dalan  parte Naeboruk no parte Usubia liga ba Uatulari no Uatucarbau kotu hotu, ne’ebé difikulta tebes transporte sira. Nune’e ha’u husu ajuda ba kompañia rua atu haruka eskavatór ida hodi normaliza dalan Usubia  metru 80, ne’ebé dalan ne’e rai taka no karreta sira labele liu,” nia akresenta.

Daudaun kompañia xineza sira ne’ebé hadi’a dalan parte Osso mak tula rai henek hodi  aterru ba dalan Usubia.

“Karreta barak iha ne’e liu ladi’ak. Ami daudaun esforsu hela hodi halo normaliza dalan parte Usubia no ponte Beaço ne’ebé agora kotu filafali, maibé ponte Beaço kuandu udan ladún boot, kareta sira bele liuhosi  mota, karik udan boot difikulta transporte sira labele liu,” Dirijente ne’e informa.

Jornalista  : Vitorino Lopes da Costa

Editora      : Julia Chatarina

iklan
iklan

Leave a Reply

iklan
error: Content is protected !!