iklan

HEADLINE, MUNISÍPIU, VIQUEQUE

Ponte Uani-uma Viqueque kotu difikulta movimentu transporte no ema

Ponte Uani-uma Viqueque kotu difikulta movimentu transporte no ema

Ponte Uani-uma iha postu Uatucarbau kotu difikulta movimentu públiku, kinta (30/06). Imajen Tatoli/Vitorino Lopes da Costa

VIQUEQUE, 30  juñu 2022 (TATOLI)—Udan-boot desde kuarta (29/06) kalan to’o dadeer iha parte leste halo bee mota sa’e maka’as no ponte Lapara iha suku Uani-uma, postu Uatucarbau, munsípiu Viqueque kotu, nune’e difikulta movimentu transporte no ema.

“Estudante no transporte labele liu mota Lapara tanba ponte kotu, difikulta transporte no komunidade sira-nia movimentu,” Xefe suku Uani-uma, Antonio de jesus, informa ba Agência Tatoli, via telefónika, kinta ne’e.

Notísia relevante: Uma-kain 30 iha suku Afalokai Viqueque afetadu inundasaun

Tuir Autoridade lokál, kondisaun ponte loloos di’ak, maibé kotu tanba mota sobu rai ne’ebé aterru ba ponte.

“Tanba ne’e, bainhira ema hakat liu mós labele, ponte ne’e uluk ha’u halo ona proposta ba Ministériu Obra Públika (MOP) munisipál to’o nasionál atu mai halo normalizasaun, maibé sira la mai to’o agora,” nia akresenta.

Tanba  ne’e, nia husu ba ministériu kompetente tenke tau-atensaun banhira udan para, tenke mai normaliza filafali ponte Lapara, atu komunidade bele halo movimentu ho normál.

“Ita-nia  estudante hosi suku Vessoru, postu Uatulari barak mak mai eskola iha Ensinu Báziku Uani-Uma no iha eskola Sekundáriu iha suku Irabin de Baixo. Entaun estrada ne’ebé Governu la normaliza tempu udan ne’e estudante sira labele asesu eskola. Tanba ne’e, ha’u husu ministériu tau-atensaun ba ponte ne’e,” nia tenik.

Jornalista  : Vitorino Lopes da Costa

Editora      :  Julia Chatarina

iklan
iklan

Leave a Reply

iklan
error: Content is protected !!