iklan

DILI, POLÍTIKA, Uncategorized

PR Horta-UNICEF diskute estratéjia Sentru Dezenvolvimentu Sedu Labarik

PR Horta-UNICEF diskute estratéjia Sentru Dezenvolvimentu Sedu Labarik

Prezidente Repúblika, José Ramos Horta, enkontru ho Reprezentante UNICEF iha Timor-Leste, Bilal Aurang Zeb Durrani. iha Palásiu Prezidente Nicolau Lobato, Bairru Pite, kinta (30/06). Imajen Tatoli /Egas Cristóvão.

DILI, 30 juñu 2022 (TATOLI)—Prezidente Repúblika (PR), José Ramos Horta, kinta ne’e. simu no halo audiénsia ho Reprezentante Unicef iha Timor-Leste, Bilal Durrani, ho delegasaun hodi diskute Sentru Dezenvolvimentu Sedu ba Labarik (ECD-siglá inglés) no Diretiva Komite ECD.

“Prezidente Repúblika konvida delegasaun hosi UNICEF atu diskute estratéjia komprovada no bazea ba evidénsia atu implementa vizaun Prezidensial ba Timor-Leste ne’ebé laiha labarik ida mate bainhira moris mai, no labarik hotu saudável, nutrisaun di’ak, aprende no seguru ne’ebé bolu Sentru Dezenvolvimentu Sedu Labarik,” Reprezentante UNICEF iha Timor-Leste, Bilal Durrani, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, Dili.

Tuir planu, Xefe Estadu José Ramos Horta mak sei inaugura ka lansa Sentru Dezenvolvimentu Sedu ba Labarik (ECD-siglá inglés) no Diretiva Komite ECD.

PR agradese ba UNICEF kona-ba servisu ba labarik sira iha Timor-Leste ne’ebé hahú hosi restaurasaun independénsia iha área saúde inan no labarik, nutrisaun, edukasaun, no polítika sosiál no protesaun.

“Prezidente dehan katak UNICEF sei sai parseiru xave hodi apoia iha Governu nia implementasaun prioridade prinsipál sira redús má-nutrisaun infantil (espesialmente raes-badak) liuhosi investe iha loron 1000 iha dahuluk, no oferese asesu ba pre-eskolár ba labarik hotu tinan tolu to’o lima,” nia hateten.

PR anunsia katak nia-parte sei lansa Diretiva Sentru Dezenvolvimentu Sedu no no sei inklui reprezentativa hosi gabinete Primeiru-Ministru, Ministra Saúde, Ministru Edukasaun Juventude no Desportu (MEJD), Ministra Solidariedade Sosiál no Inkluzaun (MSSI) no Ministru Administrasaun Estatál (MÃE) no sira seluk.

PR sei lansa Sentru Dezenvolvimentu Labarik Sedu (EDC) iha edifísiu Palásiu Prezidensiál Nicolau Lobato, Bairru Pite, Dili.

Sentru ne’e sei fornese servisu lima hanesan; dahuluk edukasaun pre-eskolár ba labarik sira idade entre tinan tolu- (3) to’o lima (5) (MOE-UNICEF).

Daruak, grupu suporta inan hodi fornese servisu tramentu ba má-nutrisaun aguda, IYCF counceling, demonstrasaun tein no simulasaun.

Datoluk, identifikasaun no intervensaun ba labarik sira ho defisiénsia iha pre-eskolár.

Dahaat, parente pozitivu no saúde mentál bazea ba komunidade no apoiu psikolojia.

Dalimak, maka rejistu moris hafoin inan-aman sira ba rejistu sira-nia oan no simu sertidaun nasimentu (RDTL).

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!