iklan

HEADLINE, MUNISÍPIU, VIQUEQUE

Uma 86 iha Beaço afetadu inundasaun

Uma 86 iha Beaço afetadu inundasaun

Komunidade Beaço afetadu inundasaun lalin sasán uma-laran ba fatin mahon, kinta (30/06). Imajen/Espesiál

VIQUEQUE, 30 juñu 2022 (TATOLI)–Udan-boot iha parte leste desde kuarta kalan (29/06) to’o dadeer maizumenus tuku 11:00 bee hahú sa’e no tama komunidade nia uma, nune’e uma hamutuk 86 iha área Beaço, suku Uma-Uain Leten, postu administrativu Viqueque vila afetadu ba inundasaun.

“Ohin dadeer ami hetan dezastre naturál, bee mai sobu ami-nia uma, bee lori ami-nia animál, estraga hotu ami-nia kintál. Ami  suku Uma-uain Leten ne’ebé hela iha Beaço, iha aldeia rua maka sai afetadu ba dezastre,”  Xefe aldeia Macalako, suku Uma-uain Leten, hateten ba Agência Tatoli, via telefónika, kinta ne’e.

Totál uma afetadu ba inundasaun hamutuk 86, kompostu hosi aldeia Makalako iha uma 69 no aldeia Kailoibere iha uma 17.

Notísia relevante: MOP Viqueque koordena parte nasionál hodi normaliza ponte Uani-uma

Kondisaun inundasaun iha Beaço, kinta (30/06). Imajen/Espesiál

Tuir autoridade lokál ne’e, komunidade balun konsege salva-an no sasán, enkuantu balun la konsege salva sasán uma-laran tanba bee ho velosidade boot.

“Daudaun família afetadu sira evakuadu ona ba fatin seguru,” nia akresenta.

Iha fatin ketak, Sekretáriu Komisaun dezastre naturál munisípiu Viqueque, Juvinal S de Ressureição, hateten, parte komisaun deside ona tun ba fatin akontesementu inundasaun iha Beaço hodi haree diretamente vítima afetadu sira-nia hela fatin.

“Ami daudaun ba Beaço hodi haree direta vítima afetadu sira no ha’u mós kontaktu ona xefe suku Maluru, ne’ebé informa komunidade suku ne’e mós afetadu hotu no daudaun rekolla ona dadus. Tanba  ne’e, ami hamutuk ho administradór postu Viqueque vila inklui parseiru Cruz Vermella sira iha munisípiu Viqueque. Ami rekolla hela dadus hodi fó apoiu emerjénsia ba vítima sira hosi suku Maluru no Uma-uain Leten ne’ebé hela iha Beaço,” nia informa.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!