iklan

HEADLINE, JUSTISA

Violasaun segredu justisa, Jornalista Raimundo Oki presta deklarasaun ba PCIC

Violasaun segredu justisa, Jornalista Raimundo Oki presta deklarasaun ba PCIC

Jornalista no xefe redasaun mídia online The Oecusse Post (TOP), Raimundo Oki. imajen/Hristo Alves Dos Santos

DILI, 30 Juñu 2022 (TATOLI)— Polísia Siéntifiku Investigasaun Kriminál (PCCI, sigla Portugés), kinta ne’e, konstitui arguidu ba Jornalista no xefe redasaun mídia online The Oecusse Post (TOP), Raimundo Oki, ba kazu violasaun segredu justisa, relasiona ho publikasaun notísia sira kona-bá kazu visum obrigatóriu ba labarik orfanatu sira iha Topu Honis, Rejiaun Administrativa Espesiál Oé-Cusse no Ambeno (RAEOA).

PCIC hala’o notifikasaun no inkéritu ba Jornalista Raimundo Oki, tanba simu delegasaun kompeténsia hosi Ministériu Públiku (MP) ho Númeru Uniku Krime (NUC) 0054/21.PGGCC.

Nune’e, Investigadora PCIC, Romenia R. Magno, hala’o enkéritu ba jornalista no na’in ba media TOP, durante oras ida, hahú hosi tuku 09:00 Otl to’o 10:00.

“Ha’u nia presensa mai iha ne’e, tanba hetan kontaktu hosi PCIC, liga ho violasaun segredu justisa, ba kazu visum obrigatóriu ba labarik ki’ik sira iha Topo Honis-RAEOA. Ha’u hanoin buat hotu-hotu fó sai tiha ona ba públiku, liuhosi eskrita no video ne’ebé ita fó sai tiha ona ba iha pábliku,” Jornalista Raimundo Oki, hateten ba jornalista sira iha edifisu PCIC, Caicoli.

Durante prosesu investigasaun iha PCIC, Jornalista Raimundo Oki, dehan hili direitu nonook, hodi hein prosesu kontinuasaun ba tribunál, mak foin bele halo esklaresementu ba kazu ne’e.

“Investigadór PCIC konstitui ha’u nu’udar arguidu ba iha kazu violasaun segredu justisa. Nune’e ha’u hili direitu nonook hodi hein prosesu tuir mai, tanba sei ba tribunál maka ita bele esklarese iha ne’ebá.,” Raimundo Oki afirma.

Nune’e, Xefe Redasaun ba Média TOP ne’e, hateten nu’udar jornalista no mós sidadaun prontu koopera ho parte justisa atu hataan kazu ne’e iha Tribunál.

Tuir kódigu Panál Timor-Leste, iha artigu 291 kona-bá violasaun ba segredu justisa, ne’ebé iha númeru ida hateten, ema ne’ebé hasoru determinasaun legál no sem kauza justa, fó-sai ba públiku aktu prosesuál penál ne’ebé tama iha justisa nia segredu, nia konteudu ka aktu ne’ebé desizaun ida proibe tiha ona, maibé publisidade nia konteudu, sei hetan pena prizaun tinan ida to’o tinan-haat.

Iha númeru daruak,sita  kuandu ajente halo violasaun ne’e ho meiu ba komunikasaun sosiál sei aplika pena prizaun tinan 2 to’o tinan 6.

Jornalista: Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!