iklan

DILI

CI husu PR Horta akompaña kazu legál ne’ebé jornalista hasoru

CI husu PR Horta akompaña kazu legál ne’ebé jornalista hasoru

Prezidente Conselho de Imprensa (CI), Virgílio da Silva Guterres. Imajen Tatoli/Osória Marques.

DILI, 01 jullu 2022 (TATOLI)—Prezidente Conselho de Imprensa (CI), Virgílio Guterres, husu ba Xefe Estadu José Ramos Horta atu akompaña jornalista na’in-rua ne’ebé daudaun ne’e enfrenta hela prosesu legál.

Notísia Relevante: Violasaun segredu justisa, Jornalista Raimundo Oki presta deklarasaun ba PCIC

“Conselho de Imprensa hato’o ami-nia preokupasaun ba Xefe Estadu atu tranzmite, nune’e Xefe Estadu bele halo komunikasaun ho entidade relevante kona-ba kolega jornalista na’in-rua ida hosi Hatutan no Oé-Cusse Post ne’ebé oras ne’e daudaun enfrenta kazu legál ninian. Xefe Estadu hato’o katak sei akompaña liu-liu ba kazu jornalista ne’ebé delikadu kona-ba segredu justisa no mós kona-ba abuzu seksuál,” Prezidente CI ne’e hateten ba jornalista sira hafoin ramata enkontru ho Xefe Estadu, José Ramos Horta iha Palásiu Prezidensiál Nicolau Lobato, Bairru Pite, sesta ne’e.

Nune’e, CI husu Xefe Estadu mós atu akompaña no halo komunikasaun ba entidade sira-ne’ebé relevante.

“Enjerál hanesan jornalista ami dehan ita hotu hakruuk ba lei sira maibé buat importante mak implementasaun lei ne’e labele mai atu sai fali hanesan intimidasaun, entaun limitasaun garantia konstituisionál sira-ne’ebé garante liberdade ba jornalista sira,” nia hateten.

PR nia resposta katak sei akompaña liu-liu ba kazu jornalista ne’ebé delikadu kona-ba segredu justisa no mós kona-ba abuzu seksuál.

Ho akompañamentu PR nian, nune’e kualkér prosesu ne’e labele sai hanesan intimidasaun ho ameasa ba jornalista sira atu hala’o sira-nia atividade jornalístiku.

“Agora buat ne’ebé ohin CI partilla mós mak CI buka atu hatene substansia hosi infrasaun ba segredu justisa ne’e hosi parte ida ne’ebé, atu nune’e CI bele haree mós prosesu ne’e,” Virgílio hateten.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!