iklan

DILI, POLÍTIKA

CI konvida PR Horta partisipa Dili Diálogu Forum

CI konvida PR Horta partisipa Dili Diálogu Forum

Prezidente Repúblika, José Ramos Horta, Enkontru ho Prezidente Conselho de Imprensa, Virgílio da Silva Guterres, iha Palásiu Prezidensial Nicolau Lobato, Bairru Pite, sesta (01/07). Imajen Tatoli /Egas Cristóvão.

DILI, 01 jullu 2022 (TATOLI)—Prezidente Conselho de Imprensa (CI), Virgílio da Silva Guterres ho nia ekipa, sesta ne’e, hala’o enkontru ho Prezidente Repúblika (PR), José Ramos Horta, hodi konvida Xefe Estadu partisipa iha abertura eventu Dili diálogu forum ne’ebé CI sei realiza iha 25-26 agostu 2022.

“Primeiru konvida Prezidente Repúblika atu partisipa iha eventu rua ne’ebé CI sei halo iha tinan ida-ne’e. Primeiru mak eventu Dili diálogu forum ne’ebé sei akontese iha 25-26 agostu. Tanba ne’e mak mai konvida Xefe Estadu atu hato’o nia diskursu abertura,” Prezidente CI ne’e hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.

Tema jerál ba Dili diálogu forum ba tinan ida ne’e mak “Dezafiu media iha Ázia” no diskursu
temátiku sira tuir mai sei ko’alia kona-ba mídia iha era dijitalizasaun, korrupsaun, seguransa dijitál.

Forum ne’e hanesan espasu atu fahe esperiénsia entaun CI sei konvida mós Konsellu Imprensa Indonézia, Tailandia, Mianmar, inklui mós peritu mídia nian sira iha rejiaun pasífiku nian mak fahe mós oinsá mak sira enfrenta situasaun no dezafiu saida mak midía enfrenta iha tempu ohin loron.

Aleinde ne’e, Prezidente CI konvida mós Xefe Estadu José Ramos Horta atu partisipa iha komemorasaun Balibó Five iha Balibo iha 16 outubru.

“Ami hateten ba Xefe Estadu katak tinan ne’e espesiál tanba iha 16 outubru hanesan lansamentu ba loron nasionál liberdade imprensa. Hanesan ita hotu hatene katak Parlamentu Nasionál aprova tiha ona rezolusaun katak loron 16 fulan outubru ne’e hanesan loron nasionál liberdade imprensa nian,” nia dehan.

PR mós enkoraja liután CI ho parseiru seluk bele hanoin oinsá hasa’e tan partisipasaun mídia no jornalista sira hosi rai seluk atu haree kona-ba Balibo ninian no halo promosaun ba atividade ne’ebé mosu iha Balibo.

Prezidente Repúblika resposta katak sei disponível partisipa eventu importante rua ne’e no bainhira iha óraiu mudansa ho atividade sei komunika ho CI.

Notísia Relevante: PN aprova 16 outubru sai loron nasionál Liberdade Imprensa

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!